Ole tamā ia Poasa Ropati, 67 tausaga mai le afioaga o Lepale i Fasitoouta e nonofo ai ma lona aiga e to’a sefulutolu (13) i o latou faleoo nei e lua. Ua 27 nei o tausaga o nonofo ai i lenei nofoaga ma e lei oo atu lava iai se paipa mo le suavai. Ole galuega tele lea a lea tamā ma lona aiga e faia i aso uma ole agai mai lea i o latou tauaiga i tai ile aai e taeele ai ma utuvai atu ai.
E iai le latou tanevai e faatali ai le suatimu mai timuga, ae a soso’o loa aso mugala ona leai lea ose suavai, ona valaau lea ole lolivai ina ia utu ai le tanevai lenei mo le totogi e $100. E 13 le aofaiga atoa o lea aiga e faaofiofi uma i faleoo nei e lua ile taimi e momoe ai, e lua tamaiti aoga ae leai se tagata faigaluega.
Ose aiga e faalagolago le tupe maua mai fua o faatoaga, a malolosi lava e galueaina faatoaga ole tele foi lena ole seleni e mafai ona faasoasoa i aoga ale fanau ma meaai ale aiga i aso uma. Saunoa Poasa, e faatolu ile vaiaso ona la’u a latou taga talo e faatau i luma ole faleoloa o Afoa i Fasitoo, ma a lelei lava le faatau e maua ile aso e tasi, e oo atu ile $200 le tupe maua mo le latou aiga.
E fai si mamao ole agai i uta ole nofoaga o aumau ai lenei aiga ma e le oo foi iai se pasi laupasese, ole tele lava o taimi e savali mai ai tai mo le itula atoa poo le sili atu foi. Ose aiga e toaaga tele e galulue auā ole faamoemoega lea mo aso uma, ole mau lea ale tamā ia Poasa Ropati. Ua mafai ona ola ai le eletise peitai na faaleagaina e le afa o Gita talu ai nei, lea oloo pauu ai le tele o uaea eletise ile taimi lenei, ma ua toe foi lava ile moli matagi ma le moli fagu e talitali ai galuega toe faaleleia ale Malosiaga ole Eletise ile atunuu. Faaalia e Poasa, na felelei uma ese le tele o apa o lo latou fale ile taimi ole afa o Gita faatasi ai ma le faaleagaina ai ole latou TV ina ua lelea i lalo ile malosi ole matagi. E tasi ale miti a lea tamā ma lona aiga, ia vave maia se aso e oo atu ai se ofe paipa i lo latou aiga ona ua amata na matutua ane le fanua ae oloo faia pea le galuega masani i aso uma ole la’u atu lea ole suavai. Ta’ua ele tamā ia Poasa Ropati, masalo ole manaoga pito sili lea a aiga uma o lo latou pitonuu o Lepale i Fasitoouta, ole suavai. E ui e nonofo ai lenei aiga to’a 13 i faleoo nei e lua ae na molimau malosi Poasa, ole naunautaiga lava ia ola fiafia ma ia manuia fanau ile lumanai.
O lana foi lea lu’itau ile atunuu, e aua ne’i mapu le ola galue, auā a vaivai loa e galue ma paie, ua matelaina loa ile fia’ai, ae a toaga lava e galueaina o tatou laueleele, e leai a se mea ole a ola falolo ai fanau. Na faamatala e le tamā lana ia galuega fai i aso uma, ole usu lea ile maumaga i uta ile talaloa faatasi ai ma le isi ona maumaga oloo i tua tonu ole nofoaga o nonofo ai nei. Ma e leai se taimi ole olaga e fia ai tusa pe leai se tagata faigaluega o lona aiga. Ose tamā e ola finau toe malosi lona loto ile galueina o laufanua ma faatoaga, ma e musu e malolo ile tele o taimi ole aso, 67 tausaga ole soifua ae oloo malosi pea e galue i aso uma.
O lana ia tatalo i aso uma, ia ola manuia lona aiga ma lana fanau ae faasilisili ai se taimi vave e oo atu ai le faasoa mo se paipa i lo latou pitonuu.
