O se tala faanoanoa lenei na alafai mai i ai le mamalu o Samoa o loo alaala i le faaitu i Aukilani i Saute, i le pitonuu o Magele, a o sauniuni atu ai le toatele o aiga, o tamā ma fanau, e saili ni meaalofa ma tapena mea uma mo le faamanatuina o le aso ua faapitoa mo o latou tina. Peitai o le tea laitiiti lava o le vaeluaga o le po o le Aso Faraile e agai i le Aso Toonai, ae gapā loa se faalavelave matautia, ina ua lavea se taavale sa agai atu ai nisi o alii talavou Samoa, ma maimau uma ai o latou ola.
Ua mae‘a ona faalauiloa e leoleo suafa uma o nei alii talavou e toafā. O le taavale na lavea ina ua latou sosoa atu se isi taavale sa paka i Massey Rd i le vaveao o le Aso Toonai na tea nei. O i latou ua maliliu o Dominic Stehlin 19 tausaga, Uesitini Tootoo 18 tausaga, Viane Gaga 18, ma o i latou uma nei e toatolu e mai le pitonuu o Magele. O le isi alii talavou e 20 tausaga, o George Lomia e mai le pitonuu o Manurewa.
O loo ave le aveai a le matagaluega o leoleo i le mamalu o le atunuu i soo se tasi sa iai tonu i lea vaipanoa i Magele i le taimi na tupu ai lenei faalavelave matautia, ina ia oo atu ma faailoa nisi faamatalaga o lenei faalavelave.
O le taavale lanumeamata o le ituaiga o le Honda Accord lea sa agai atu ai nei alii talavou i se saoasaoa ua matuā sili mamao ma le saoasaoa faatulagaina i luga o le aualatele.
E foliga mai sa taumafai leoleo e tuliloa le taavale e taofi, ae na matuā faigata ona o le matautia tele o le saosaoa sa alu ai le taavale a nei alii.
E faalua ona taumafai leoleo ae sa lei mafai, seia oo ina tulai mai lenei faalavelave i le auala lea i Massey i Magele.
O nei tama talavou uma o ni tama sa a‘oa‘oina i le kolisi a De La Salle ma faasolo mai lava le faigauo a nei alii, ae pagā lea ua iu lē manuia le gasologa o o latou olaga talavou.
O le alii o Viane Gaga lea na mulimuli uma lona ola, ina ia malilie si ona aiga e ui ina faigata, e tape loa le masini sa faamānava ai i le aoauli o le Aso Sa, a o tumutumu ai lava i autafa o lona moega si ona aiga.
O loo faamauina o le ava malosi le faapogai o lenei faalavelave matautia ua maumau ai soifua.
O le alii o Dominic Stehlin, e talitonuina o ia lea sa i le foeuli o le taavale. Tau ina ia iai faamafanafanaga uma i mātua, uso ma tuafāfine ma aiga faavauvau o nei
alo talavou.
