O loo fuafua e na o le $40 miliona le tau o le fale fogafale sefululima
O le fuafuaga a le Malo e fausia se nofoaga tutotonu mo fefaatauaiga poo se Trade center, o loo finau ai finagalo o le Itu Agai ma le Malo i le tau o lea galuega tele. Ua faailoa e le minisita agai o tupe poo le shadow minister for finance a le Tautua Samoa party, le afioga Afualo Dr Woods Salele, ua fuafua le Malo e faia se nonogatupe tele e silia i le selau miliona tupe Amerika e faatino ai lea galuega.
Ua atugalu ai le minisita agai a le vaega faaupufai o le Tautua Samoa i le taugata o lea galuega ma ia faailoa ai, le oo atu o aitalafu a le atunuu i le silia ma le tasi le piliona pe a faatino lea nonogatupe mo le fausia o lea fale tele.
Peitai o le feiloaiga a tusitala ma le taitai o le Malo i le alii Palemia susuga Tuilaepa Lupesoliai Sailele Malielegaoi na faaalia ai e le taitai o le Malo, e lē sa‘o lea folasaga a le minisita agai o le Tautua Samoa. Saunoa Tuilaepa e lei faagaioia se nonogatupe i le taimi nei ona o loo taoto pea le mataupu i le laulau a fono a le Kapeneta mo le soalaupuleina i ona vaega uma.
Ua faaalia ai foi e le Palemia, ua fai si vave vave o le sui faipule ma o le mea lea e ta‘u o le oso a popa, o le pa‘ō ma oso ae lē faia lelei suesuega a le Itu Agai i le mataupu. Ua faailoa e le Palemia o le tau o le galuega pe tusa ma le 40 miliona peitai na te lei faailoaina poo ni tupe Amerika poo tupe Samoa.
O le tasi o feiloaiga a le taitai o le Itu Agai ma tusitala i nai vaiaso e lei mamao tele atu sa ia faaalia ai o le tau o le galuega e sili atu i le fa selau miliona. O le fua a le taitai o le Itu Agai e sefululima fogafale ae o le fogafale fitu lea ua mae‘a fausia i Sogi e selau ma ona tupu miliona tala.
O le malaga a le Minisita o Tupe le afioga Faumuina Tiatia Liuga i Saina i le masina nei ua lipotia o le a saili fesoasoani ai i le itu tau tupe i lea Malo agalelei mo le fausia o le fale fogafale sefululima. O se isi lea o galuega tele a le Malo o loo tu nei i le foe e iai le talitonuga o le a faatino i le tausaga fou ma e tatau ona mae‘a a o lei faia le isi faigapalota tele a le atunuu i le tausaga e 2016.
O le a suia atili ai ma foliga o le taulaga i le itu i maota tetele o fausaga faaonapo nei pe a tulai mai lea maota fou i se taimi o le a
mae‘a ai.
