Faamavae atu Samoa ia Tauā Kitiona Seuala

O le gasegase o le kanesa ua tuumalo ai le Afioga Seuala Tauā Kitiona, o se tasi o taitai talavou i ona vaitaimi na ofi atu ai i le Palemene o Samoa ma umia le tofi faipule faapea le tofi Minisita i totonu o paeaiga e tolu na fai ai ma faipule o le Itumalo o Aleipata Itupa i Luga.
O le 54 o tausaga o le Afioga Seuala T. Kitiona lea na valaauina ai o ia, ua mae‘a finauga ma le gasegase faigata o le kanesa (prostate cancer). Ua tele masina o sii atu le gasegase o le auauna i Ausetalia mo se sailiga o se togafitiga peitai ua maliu ai lava lenei foi tamalii o upufai o Malo i Samoa nei.
O le Afioga Seuala e see ese ma faiga faapolokiki i Samoa sa ia tauaveina le tofi Minisita o le Matagaluega o Faatoaga ma Faigafaiva. Sa avea foi o ia ma Minisita Lagolago o le Matagaluega o Faamasinoga a o lei avea ma Minisita o le Kapeneta.
O finauga i luma o le Faamasinoga o Faigapalota, i le mae‘a ai o le palota tele a le atunuu i le lua tausaga talu ai na malolo faatasi ai lava Seuala ma le Afioga Fuataga Kasimani, lea na la tauva mo le nofoa o Aleipata Itupa i Luga. Na toe faatautaia le palota laitiiti a le Itumalo ina ua malolo uma nei taitai e toalua ma tulai mai ai loa le tofi o iai nei o lea itumalo – le Afioga Faga‘ivalu Ken Samu.
Sa iai se minute lē leoa na faatautaia mo le afioga ia Seuala, ina ua faamanatu le 34 tausaga o lana Vaega Faaupufai, le Vaega e Puipuia Aiā Tatau o Tagata, le HRPP. O le vave amia o lenei taitai na ta‘ua e le Alii Palemia i lea aso faamanatu, o se lesona tāua tele lenei e tatau lava ona usitai i ai le toatele o alii.
Ia agai e siaki i latou i le falemai poo a latou fomai, ona e lē iloa lava le tulai mai o gasegase ogaoga faapea ae toe agai atu e togafitia ua tuai ma maumau ai soifua ae o loo tele galuega e fia faatino.
O le kanesa i Samoa o le gasegase lona lua lea le toatele o tagata ua maliliu ai, ma o le tele lava o faafitauli ua molimauina i Samoa o le toatele o i latou ua aafia ma maliliu i le kanesa, o le tuai lava ona siaki ua aafia ai.
O le Aso Toonai na se‘i mavae atu nei na molimoli mai ai le tino maliu o le afioga Seuala mo le lagomau ai i Samoa nei ma o le Aso Toonai lava na maua ai se taimi e avatu ai lona sā i le Maota Tatalo o le atunuu i le Mauga o Vaea mo se sauniga puupuu na iai uma sui o le Malo ma isi faipule o le Palemene.
O le aso la ananafi, aso 22 Aperila, lea na faatatautaia ai loa ona toe sauniga i Lalomanu i lona afioaga ua lagomau ai lava i lona oliolisaga tumau. O se taitai e galue ma e naunau tele i lona itumalo, e pei ona molimau i ai sui o le itumalo aemaise ekalesia na ave i ai le tele o taimi o lenei taitai e atinae ma lagolagoina.
O se taitai foi e malosi tele i meafai a lona aiga, ma o ia lava e vaaia o taulamua i soo se potopotoga tele e faia a lona afioaga o Lalomanu a o malosi o ia.