Amata galuega faamanatu ai 125 tausaga o le Malisi

O le aso 28 o le masina o Aukuso o le tausaga nei e faamanatu ai le atoaga o le 125 tausaga o le Malisi i Samoa ma o le galuega tele ua feagai nei ma le kalapu faapea le pulega o le aoga a le Malisi i Mulivai o le fausia o se maota fogafale lua mo le aoga i le tau e tasi le miliona tolu selau afe. Ma e faamoemoe le Asosi e tatau ona mae‘a le galuega i le amataga o le masina o Aukuso, e faatatau tonu i le aso e faamanatu ai lea aso faapitoa.
O le aso 15 o Aperila na suaina ai le eleele i se sauniga e aloaia ai le amatalia o le galuega lea sa faatino e se tasi o tama tuai o le malisi le afioga i le Palemia, Susuga Tuilaepa Sailele Malielegaoi ma se tasi o Felela sa galue ai i le aoga i tausaga e tele, le susuga Brother Brian.
O le tausaga e 1888 na uluai faavaeina ai le aoga a le Malisi i Mulivai lea sa aoaoina ai ma le Palemia a o itiiti ma talavou, faapea le toatele o tamalii ma failauga o le atunuu faapea nisi ua galulue i galuega tala‘i i le tofi faifeau e lē gata i le ekalesia Katoliko, a o isi ekalesia kerisiano.
O se galuega tele ua fausia o le a faaaogā mo le aoaoina o fanau i le aoga a le Malisi i mataupu i le faaaogāina o masini computers ma aoaoga faasaienisi. O le a iai foi le potu mo le aoaoina o taaloga ma le mataupu o le art. O le galuega o le fale fogafalelua ma e vaevaeina, o le pito i luga o le a i ai le potu tusi ma le potu faasaienitisi, a o le fogafale i lalo o le a fai faapitoa mo vaega tau faamalositino.
I le saunoga autū a le alii Palemia, sa ia ta‘ua ai le tāua o le galulue faatasi, e māmā ai se avega. Na faailoa foi e le Afioga i le Palemia, le telē o le sao o le Malisi i le atinaeina o itu tau i aoaoga i totonu o Samoa i tasuaga e tele. “O lea ua tatou potopoto e molimauina se tasi o atinae i le tala faasolopito talu ona faavaeina le Aoga.”
Na saunoa le Afioga i le Palemia, o ia foi o se tasi o tama tuai a le Malisi, ma ua faagaeetia foi ona ua mafai ona faataunuuina le faamoemoe a le Asosi. “E leai lava se galuega e lē faataunuuina lona fuafuaina, auā o loo au le Atua ma outou i le faataunuuina o atinae mo le manuia o alo ma fanau o le atunuu.”
O le Konekarate a le Diamond Head Construction o le a faatinoina le galuega, ma o le susuga ia Julius Fruean o le sui o le Konekarate ma le Peresitene o le Asosi, Brother Peseta Kasiano na sainia le feagaiga mo le fausiga o le fale, ma ua amataina ai nei le galuega e pei ona faatino ai le sauniga.
Na saunoa le Peresitene o le Asosi e faapea, o le faamoemoe tele lea a le Asosi auā le faamanatuina o le 125 tausaga talu ona faavae le Aoga a le Malisi.
E lē gata i lea ua leva ona fuafua le Asosi ia faia se isi fale fou, ona ua leva tausaga o iai le faletusi tuai, o potu mo mataupu tau saienisi ma le potu komepiuta.
O le tausaga e 1888 na faavaeina ai le Aoga, ma talu mai lona faavaeina e tele nisi o atinae na faatino mai ai i lea taimi. O se tasi o vaega na ausia o ia atinae, o le faavaeina lea o le Aoga a Sagato Iosefo i Lotopa.