Sauni Levaopolo e finau lona mamā i moliaga, pusaoloa fagu uisiki

Sa tamau le afioga i le faipule le tofa ia Levaopolo Talatonu i lona finagalo na faaali faalauaitele i lipoti na afua mai i se pepa o faasalalauga mai le pulega o le ofisa o le tiute, e uiga i se pusaoloa o fagu uiski, e matuā leai se aafiaga o lana kamupani ma lona tagata i le aumaia ma le aveina i tua o lea pusaoloa.
Ua alualu suesuega a le ofisa o le tiute ma leoleo ua taunuu i le molia o se tasi o tamaitai o le kamupani o le Island Freight, ae ua molia atu ai foi ma le faipule i lalo o le tulafono a le ofisa o le tiute le Customs Act. O le tofa Levaopolo Talatonu e umia le kamupani.
E sefulu ona moliaga e fesootai ma le faaseseina o pepa o faamaumauga o oloa na aumai i le container poo le pusaoloa. I le feiloaiga ma tusitala na saunoa le faipule, o le pusaoloa o loo tuua‘ia ai lana kamupani na aumai ai oloa a ni tagata poo personal effects ae lē o ni pusa fagu malosi o le ituaiga o le uisiki e pei ona molia ai o ia ma le tamaitai faigaluega o lana kamupani.
“Na aumai muamua moliaga e molia la‘u kamupani, ae toe avatu ua aveese la‘u kamupani ae tuu i ai a‘u”, o le faamatalaga lea a le faipule ina ua fesiligia. “Ua ou fiafia ua aumai le mataupu lenei ma tuua‘ia ai a‘u, auā ua ou sauni e fofola uma i le faamasinoga le mea moni”.
Na saunoa foi Levaopolo Talatonu e tele isi mea faaletonu o loo ia silafia i le ofisa o le tiute ma ua sauni foi e fofola mai i se taimi. Peitai sa ia lē mafai ona faailoa i tusitala poo ā ia mea faaletonu.
O le Aso Lua na tea nei na tulai ai Levaopolo i le faamasinoga ma tuuina atu ai lana tetee i moliaga uma e sefulu, ma o loo tulai lava o ia e tali moliaga e aunoa ma se loia.
O le aso foi lea na tulai ai ma le tamaitai faigaluega o lana kamupani o Christina Ainuu 34 tausaga le matua ma o loo tulai ai le alii loia o Toleafoa Solomona Toailoa.
O loo tetee foi o ia i moliaga peitai ua talia e le faamasinoga le talosaga a leoleo mo se taimi faaopoopo e faaauau ai a latou suesuega mo le faia o nisi moliaga faaopoopo.
E iai se isi pusaoloa o katuni foi o fagu malosi o le uisiki o loo suesueina e leoleo poo ai le tagata na aumai i ai, ma o loo taatia i le uafu le pusaoloa e lei aveina i tua. Ae o le pusaoloa o loo molia ai le faipule ma se tagata faigaluega o lana kamupani o loo masalomia ai se alii faipisinisi e faapea o loo malaga ese ma Samoa mo Ausetalia.
O loo faatalitali leoleo i le taimi e taunuu ai ona suesueina lea. Ua faaalia i se isi lipoti afai e lē toe foi i Samoa o le a faia feutanaiga e tusa ma tulafono faavaomalo e aumai ai lea tagata i Samoa mo suesuega ma tali i ni moliaga e ono faia e leoleo.
O le aso 14 o le masina fou o Me e toe tulai ai le tamaitai o Christina Ainuu i le faamasinoga, ae o Levaopolo Talatonu o le a suesueina ona moliaga i le aso 16 o Setema 2013.