A’o faagasolo ai pea taualumaga o le faamasinoga o ni faatonu, faapea le sui a faipule o le Palemene ma lona faletua ma se tagata faigaluega o le kamupani nonu o le Local Partners and Associates, o le uluai molimau a ē o loo molia o le susuga Laauli Leuatea Polataivao Schmidt ua ia faailoa o se fonotaga a faatonu ia Aperila o le tausaga e 2014 na faailoa ai e le afioga Peseta Vaifou Tevaga o le a o ese ma le kamupani ma lona atalii o se tasi o faatonu e iai ona sea i le pisinisi.
O le mafuaaga lea e pei ona faailoa e Laauli i lana molimau na talanoa ai ma isi faatonu o Apulu Lance Polu ma Martin Schwalger o le a suia loa le igoa o le kamupani i le Samoa Nonu Delights e pei ona sa tatala ai se teugatupe i se tasi o faletupe i lalo o lea igoa ma ave loa tupe na maua mai i le faatauina o le sua o le nonu ma teu ai.
O se tasi o faatauga o le sua o le nonu na maua ai le tinoitupe e tolu selau afe tala sa fuafua e amata ai ona faatau se fanua o le kamupani e faato’a ai se faatoaga o le laau o le nonu lea na maua ai se 27 eka o fanua mai le Malo i lalo o le faalapotopotoga o eleele a Samoa poo le Samoa Land Corporation.
Na faailoa foi e Laauli i lana molimau o le o ese o Peseta ma lona atalii mai le kamupani na faatalanoa ai loa le ave o sona fanua e faamau ai le nonogatupe i le NPF lea sa muai faamauina i se fanua o Peseta.
O le tausaga e 2015 na sologa lelei tauamafaiga a le kamupani i le faatauina o le sua o le nonu peitai na faaalia e Laauli sa iai to’a na fetaia’i ma lea tulaga lelei ina ua savalia e Peseta se tasi o a latou paaga sa faatau i ai le sua o le nonu ma faailoa i ai o le a ave lana su i le faamasinoga faasaga i le kamupani.
O se isi to’a na faailoa e le molimau o loli a le kamupani sa lisi e le kamupani avamalosi o le Vailima sa maua ai se isi alagatupe peitai na oo foi Peseta i le Vailima ma fesiligia le lisiina o ia aseta ma faailoa foi i ai lona sauni e su le kamupani avamalosi ma faatonu o le pisinisi nonu ona o le faaaogāina o loli.
O loo faaauau pea le molimau a Laauli ma a mae’a ona fesiligia e lana loia ona maua lea o le avanoa o loia a le itu a leoleo e fesiligia ai le molimau muamua ua tulai a i latou e toalima o loo molia.
Se isi mataupu mai le faamasinoga
I se tasi o a tatou lipoti mai le faamasinoga, o lea ua faia le faasalaga faafalepuipui mo le alii pese ma talenia o le atunuu i le ituaiga o le musika o le rap e iloa tele i lona igoa o Zipso ae o lona suafa moni o Sipili Nanai.
Na ioe o ia i le moliaga o lona faaoomanu’a i se tamā e tuaoi o latou fale i Solosolo ma na ia umia se agaese o se sapelu ma faaoo ai ia manu’a lea na aveesea ai tama’ilima se lua o lē na aafia.
O le ogaoga o manu’a ona o le faaaogāina o se aupega na amata ai le fua a le faamasinoga i le lima tausaga peitai sa toese nisi masina ona o itu lelei o lē ua molia, o lona ioeina o moliaga ma lana faatoesega na faia i le tamā na faamanu’alia ona totoe ai lea o le 2 tausaga ma masina e fitu ua tuli nei o lona faasalaga i le falepuipui.
