O le tausaga e 2015 o le tafaoga lona lima lea a le tamaitai e autu iai ata tifaga i Amerika o Roberta Haynes, ina ua faamanatu le 60 tausaga talu ona pue i Matautu i Lefaga le ata tifaga o le Toe foi i le Parataiso (Return to Paradise).
O le Aso Tofi ua mavae na taunuu ai i Samoa le tino maliu o Roberta ua uma ona faaliu lefulefu mo le sauniga e faia i le Aso Lulu o le vaiaso nei e lagomau ai i le matafaga lau oneone o Matautu Lefaga na pue ai le ata tifaga lea foi ua iai ma le faletalimalo ua faaigoa o le Return to Paradise Resort.
O le atalii o Roberta o Jonathan Ward o lona toalua ma le la fanau na molimoli maia i Samoa le lefulefu o le tamaitai na maliu ia Aperila o le tausaga nei ina ua 91 tausaga o lona soifua.
O se tasi lea o manaoga o le tamaitai na tuuina atu i lona aiga ina ia aumai lona tino e lagomau i Samoa pe a maliu.
O le ata tifaga e pei ona silafia sa autu ise alii Amerika o Garry Cooper ma Roberta Haynes, ma sa iai foi nisi o tagata Samoa sa iai a latou vaega na faatino i le ata e pei o le afioga Le Mamea Matatumua o le tuaa lea o le tina o le afioga i le sui Palemia o Fiame Naomi Mataafa.
O le sauniga e faia i le vaiaso nei i le faletalimalo o le Return to Paradise Resort o le afioga i le sui Palemia o se tasi o le a faia sana saunoaga e manatua ai le tamaitai o Roberta ma e uma sa iai i le ata tifaga aemaise o le sao o lea ata i le faalauiloaina o Samoa i le lalolagi.
O le tausaga e 1952 na pueina ai ae o le 1953 na amata ona salalau ai le ata tifaga i Amerika ma isi atunuu o le lalolagi.
O se tasi o tamalii o le atunuu o loo iai foi i le ata o le susuga Felise Vaa poo le susuga Laulu Felise a’o talavou lona soifua.
O uo mamae a Roberta Haynes a’o iai i Samoa i le 1952 i le pueina o le ata tifaga o le faletua o Freida Keil Paul ma nisi o tina ma tamaitai iloga o le atunuu i lea vaitaimi.
O ia o se tusitala o se tasi o nusipepa iloga sa iai i Samoa ini tausaga ua mavae o le Samoa Times. Sa avea foi lea tamalii ma faiaoga o le Iunivesite Aoao a Samoa ma ua malolo litaea.
