O le vaiaso talu ai na faatinoina ai se polokalame faalauiloa a le faalapotopotoga o le Civil Society a Samoa le CSSP mo faalapotopotoga laiti i Nuu ma Afioaga e fia faia ni talosaga mo faamanuiaga tautupe ua mafai ona ofoina atu mo atina‘e i totonu o Afioaga.
E lua ni vaega ua vaevaeina ai nei faamanuiaga tautupe, ma e pule lava le faalapotopotoga i le vaega e fia talosaga ai e tusa ma aiaiga ma faiga faavae o le faamatuuina atu o nei seleni.
O le vaega 2.1 e amata lona aofai i le $30,000 ae lē sili atu ma le $70,000, ma le vaega 2.2 e amata mai i le $70,000 ae lē sili atu ma le $150,000.
Ma o nei faamanuiaga e agavaa ai soo se faalapotopotoga tumaoti i nuu ma alalafaga o fia maua se fesoasoani tau seleni mo latou atina‘e.
Na ta‘ua e le tamaitai pule sili o le CSSP, le afioga ia Leiataualesa Kilali Alailima, e agavaa Faalapotopotoga Tumaoti, faalapotopotoga i nuu ma afioaga mo nei faamanuiaga tautupe, ma o nei polokalame faalauiloa o le a fesoasoani tele mo latou aemaise i faamatalaga moomia mo le faauluina mai o talosaga. Sa ia ta‘ua foi o le faamoemoe autu ia mafai ona fesoasoani i atinae a nuu ma afioaga i tua aemaise i aiga ma e e aupito maulalo le tamaoaiga ma o fia maua se fesoasoani tautupe mo atina‘e.
O nisi o atina‘e ua mafai ona lagolagoina ma faatupeina e lenei polokalame e iai, tanevai, faaleleia o vaipuna ma vaiinu, malae taalo, faatoaga ma atina‘e tau lafumanu, faasao Tilapia, faaleleia o faleaoga ma fale Komiti ma isi.
Sa saunoa le tina ia Miriama Lima, se tasi o sui mai Salani Falealili na auai i se tasi o polokalame faalauiloa i le vaiaso ua tea, “o polokalame faapenei o le a fesoasoani tele i atina‘e a lo matou afioaga aemaise ai i le tele o tupulaga lē faigaluega i lenei vaitaimi”.
Sa ia ta‘ua foi se tasi o aoaoga faiva alofilima na mafai ona faatupeina i lalo o lenei Polokalame ma sa aoaoina ai nisi o tina ma tamaitai i le suisui ma le elei, ma o loo faatau atu i tagata tafafao maimoa mai fafo o loo nonofo i faletalimalo i Salani lava.
Na saunoa Miriama, o lona auai i polokalame faalauiloa ona o le naunautaiga o nisi o tina e fia faia se latou pa i‘a. O le faamoemoe o le a fesoasoani lenei atina‘e i tupulaga e faaaogā ai lo latou taimi.
O le a mafai foi ona sailia mai ai se seleni auā le tausiga o aiga ma Ekalesia. O lenei Polokalame o se tasi o fuafuaga a le Malo o Samoa ma ana Paaga mai fafo e pei o le Malo o Ausetalia, ma le Iuni a Europa.
