Sauniga faapitoa mo tamafanau Pasefika ausia sikolasipi aoga CPIT

E selau (100) avanoa faasikolasipi na ofoina mai e le malo mo soo se tamafanau Pasefika i Kalaiesetete e a‘otauina ai i totonu o le aoga Canterbury Polytech of Institute and Technology i matata eseese poo agavaa faapitoa (Trades Scolarships) mo le lua tausaga. O le faamoemoe maualuga ia maua le tomai e galue mo le toe fausiaina o le aai. Ua aofia ai mataupu e pei o le kamuta, palama, faieletise, uelo, inisinia, furniture & joinery faapea le painting & decorating.  E to‘a 44 i latou ua faamanuiaina mai le faaiuga o le masina o Tesema 2011, peitai i le taimi nei ua to’a 50 sikolasipi e aofia ai Toga, Cook Is, Fiti, Niue ae pito toatele ai le fuainumera o Samoa.  E maitauina ma le loto faagaeetia ona o loo iai ma le aumatutua e tausinio i le taufetuliga. O se sauniga lotu faapitoa na faataunuuina lea i le malumalu o le EFKS Woolston sa taitaia e le susuga i le Toeaina Tumama Vili, nisi o faifeau atumotu sa mautofi i le sauniga o Rev Ari‘i (Cook Is), Pstr Tikinimasei (Fiti) ma Pstr Moa (Toga).

O le susuga i le Toeaina Fitifiti Luatua (PIC Aranui) sa lauga e tomatauina aemaise le fofogaina o suafa o i latou ua faamanuiaina ma e toalua tamaitai Samoa na filogia ai mai le itupa uma o alii. Sa auai le pulega ma le ofisa o le matagaluega CMPA lea o loo faatinoina le faamoemoe mo fanau Pasefika mai le Polytechnic, faapea nisi o susuga alii faifeau na mafai ona faatasi atu i lea afiafi o le Aso Sa aemaise aiga ma uo e molimauina le sauniga faapitoa.  Matagofie viiga o le Atua na saunia e le aufaipese EFKS Woolston faatasi ma le pese filifilia a sikolasipi na taitaia e Peni Latavao mai le ofisa CMPA.

O ni upu faalaeiau ae o se faamalosiau aogā mo tamafanau a o faasauni atu e finau mo a‘oa‘oga i nei tomai faapitoa na saunoa i ai susuga i Toeaina Tumama Vili ma Fitifiti Luatua, o se luitau malosi ina ia faaauau auā a manuia ma tau lau o le faamoemoe, o le a faamanuiaina i galuega i totonu lava o Kalaiesetete.

Ua faapea ona amatalia nisi o courses mo le 2012 ae o loo tatalaina pea avanoa mo i latou e fia ulufale. Tau ina ia manuia le alo atu o fanau Pasefika mo le taumafai.