O vaa poo meli tetele nei e malaga ai le toatele o tagata i tafaoga i luga o le vasa laolao i ni aso se tele, na faapea ona faaaogāina e le tamaitai o Sula Keith ma lona alii ia Brian Keith e faamanatu ai le aso soifua (60 tausaga) o le tamaitai o Sula.
Sa faaalia i le sooatulau le tulaga na fiafia i ai le tamaitai o Sula ona o le la malaga taamilo i luga o le vaa (cruise) na faatupe uma e lo la alo ia Alison, o lana meaalofa lea mo lona tina, ma o le faafitu ai lenei ona feoai lenei ulugalii ona o le la fiafia i soo se taimi e malaga ai i luga o nei meli tetele.
Fai mai Sula e leai se mea e popole ai i luga o nei meli poo vaa tetele ona e pei lava o loo i luga o le eleele matutu. E maua ai le tele o taaloga e fiafia ai faapea ma soo se mea faafiafia e oo lava i vai taele e auau ai (swimming pool) e manaia tele i tagata tafafao.
O fale‘aiga, faleoloa, faletifaga faapea foi soo se taaloga e pei o piliati, faataavale polo ma tenisi e maua uma lava i luga o le vaa. E tele foi taumafa eseese e saoloto ai.
O le taamilosaga a le vaa e afea taulaga nei e pei o Hong Kong, Peretania, Asia ma isi taulaga pei o Sini ma Darwin i Ausetalia. Sa afeafe solo ai faapena lenei meli tele ma tafafao solo ai i soo se atunuu e afea.
Na soifua mai le tamaitai o Sula i Nofoalii, malaga mai i Niu Sila ma aoga ai i le Kolisi a Viard i Porirua. Na faaipoipo atu ia Brian Keith o Tawa ma nonofo ai i nai tausaga, ma faagasolo atu ai i Ausetalia ma ua nonofo mau ai nei i Brisbane.
E lua masina o loo tafafao ai Sula ma Brian i le meli taamilo lenei ma e toe foi mai i le masina lenei o Iuni. Manaia foi sia auala e faamanatu ai aso soifua, o le tafao lea i luga o nei meli tetele ma iloa atu ai isi atunuu o le lalolagi. Ia manuia tele le faamanatuina o lou aso soifua i lou 60 tausaga Sula Keith!
