O le alofa ua fai lea ma sulugatiti ia Rhys Suaalii ma Kasileta Sanele ma ua avea ai o se aiga e tasi i luma o le Atua. Ua feofoofotai foi le alofa i le sauniga Paia o le faaipoipoga ma ua avea ai o se mafutaga ma se aiga ua faavae i luga o le Papa o Iesu Keriso e lē mafai ona maluelue i peau o le olaga nei.
O faamanuiaga ma alofaaga o aiga na lua, uo ma ē masani na lagona i le aoauli o le Aso Sa ua mavae i totonu o le malumalu o le Ekalesia Aso Fitu i Royal Oak i Onehunga ina ua mae‘a le osigafeagaiga a le alii o Rhys ma le tamaitai o Kasileta.
O loimata o le olioli a o foliga o le fiafia i aiga uma ina ua tau lau o le faamoemoe a le fanau i le alofa o le Atua. Ae lē gata i lea, o upu faalaeiau na saunoa i ai le taitai o le sauniga ia Pastor Chris Sululoto mo le aiga fou.
E tolu vaega na luitau ai le fanau i le fausia o le aiga, (1) Atua; (2) Taimi; (3) Faatinoga – o le Atua e faamuamua i le aiga, o lou taimi i lou aiga, ma le faatinoga poo le faiga o lou aiga i se lelei e tatau ona oo i ai. O le tumutumuga o lenei sauniga ia savavali le aiga fou ma faavae pea le aiga i le Atua e manuia ai.
Na faaauau le mafutaga fiafia i le faleaiga o le Manhanttan i le taumafataga ma faagasolo ai nisi o faafiafiaga a aiga taitasi, o aitema a le aumea mamae a le tama ma le teine ma siva a aiga o le ulugalii fou, aemaise o molimau a tuaa o Rhys ma Kasileta e tusa ai ma le mafutaga i totonu o aiga.
Sa lelei le malaga a le vaa i le lelei o le taotao ma le faatautaiga a le kapeteni (MC) ia Pat Lafaele, seia oo i le taimi na pasi atu ai i le tofa ia Sulufau Afumua Paulo (tutootoo) na te faatini le malaga e ala i faaaloaloga mo susuga i faafeagaiga ma le mamalu o le auvalaaulia sa auai, ae na tali faitau foi le sui o le Ekalesia le tofa ia Tafili Tauati e tusa ma le faaaloalo.
O Rhys Suaalii e nofo i Melepone ma lona tina ia Rona Suaalii, a o le tamaitai o Kasileta o loo aumau i Niu Sila nei ma ona matua ia Reupena Unasa Sanele ma Kalameli Unasa Sanele.
