O le Aso Sa 24 o Me e oo atu i le Aso Faraile 29 o Me o le vaiaso na tuanai atu lea sa filifilia e Niu Sila atoa e avea ma vaiaso e faatāua ai le Gagana Samoa. E faapena le agaga ma le loto atunuu o le aufaigaluega Samoa o loo galulue i le ofisa o le ACC i Counties Manukau.
O le fia galulue faatasi ma tagatānuu uma o Samoa i le faamanatuina o le Vaiaso o le Gagana Samoa. E lē misi lava se tausaga ma faamanatu e le ofisa o le ACC lea faamoemoe, ae o se tausaga ese lenei ua iai le suiga ua agai i ai le faatinoina o le Vaiaso o le Gagana Samoa. Ua vaevaeina le aufaigaluega Samoa i ni vaega se fā ua faaigoaina ia Nafanua, Salamasina, Levalasi, ma Samalaulu.
E pei ona iai aiaiga sa faataatitia e le tofa ia Leauga Ata Sofara, o ia o le faufautua faapitoa o le vaega a le auaunaga a le Pasefika i le ACC, o aso taitasi o le vaiaso, e amata mai i le Aso Gafua e oo atu i le Aso Tofi, sa taumafai ai vaega taitasi nei latou te aumaia mo le silafia o le aufaigaluega atoa i Manukau e 140, mafuaaga e tautaua ai nei tamaitai iloga o Samoa i o latou vaitaimi na soifua mai ai, atoa ai foi ma le silasila i gafa taitasi ma tupuaga o nei tamaitai.
Na maitauina foi i le faagasologa o lena vaiaso le iai foi o le sao o nisi o le aufaigaluega e lē o ni Samoa ae o loo maupaolo i alii ma tamaitai Samoa ma i latou palalagi sa fia auai e faatāua lenei vaiaso e tasi sa tapenapenaina ai.
Sa taualuga lenei vaiaso tāua i le Aso Faraile i le tauvaga Tausala o nei tamaitai iloga i le tala faasolopito o Samoa. Sa matuā faatumulia le ofisa i Manukau i le tapenaina o tamaitai na lautogia i vaega taitasi e fai ma a latou tausala.
O le aiaiga na taulai i ai le faamoemoe o le lē faatagaina lea o se tamaitai Samoa e fai ma tausala, ae tuu le avanoa i isi tamaitai o le ofisa e teteu ai i teuga taupou faatasi ai ma le a‘oina o le faamatalaina faasamoa o lona suafa, o le nuu na soifua mai ai ma lana galuega faatino i totonu o le ACC.
Sa lē faigofie le galuega a faamasino ona o teuga ma tapenaga a nei tausala filifilia, e fai o le lalelei o sui taitasi ae leai foi se isi e sasi lana tautala i le gagana Samoa i le faamatalaina o vaega e pei ona lautogia ai le tauvaga.
Ae peitai e lē mua uma ni vaa. O le iuga na oo i ai le taumafaiga o vaega taitasi na faapaleina ai le tamaitai o Cherie Esekielu i le pale o le tausala o le 2015 o se tamaitai Maori ae maupaolo i se alii Samoa mai le vaega a Samalaulu. Tulaga lua na maua e Levalasi. Tulaga tolu o Salamasina, ma le Tulaga fā o Nafanua.
O le maualuga ma le matagofie o lenei faamoemoe o le faasoa lea o le gagana Samoa ma le tāua o tamaitai Samoa ua mafai ona tufa ma faailoa i tagata papae aemaise o alo ma fanau na soifua mai i totonu o lenei atunuu.
O measina a Samoa e iloa ai i atunuu i fafo. O le agaga fiafia o le taitai o Samalaulu le afioga ia Toleafoa Neil Soonalole i le manumalo, ona o tapenaga sa taumafai uma i ai lana vaega.
Na faaiu le polokalame i se taumafataga tele sa saunia e le aufaigaluega Samoa mo le mamalu o le aufaigaluega ma malo valaaulia sa auai i lea aso i le ofisa o le ACC i Counties Manukau.
