Na matagofie le aso faamoemoeina o le malo tutoatasi o Samoa, i lona 48 tausaga sa faamanatuina i Aukilani i le vaiaso talu ai. O se tausaga ese lenei i le aai o Aukilani i le faatinoina o lea foi aso tāua mo soo se Samoa lava. O le tulaga ese o lenei tausaga mo Aukilani lava latou, ona o se taimi muamua lea ua suia ai faiga e masani ai, mai le tele o tausaga talu ai.
O le faamoemoe o lenei tausaga, sa faalemalo lona faataunuina, o le polokalameina, ma le fuafuaina o le sisigafu‘a o le 2010, sa palasi lea ma sa nafa ma le ofisa o le malo le Konesula i Aukilani ma le Hai-Komesina i Ueligitone.
O le afioga lava i le Konesula, Faolotoi Reupena Pogi, sa fai ma fofoga o lea po, i le faafeiloaia o malo faaaloalogia, aemaise o le mamalu o Samoa sa valaauina faapitoa, atoa ai ma le faasoloina o le polokalame. O le saunoaga autū a le malo, sa fofogaina lea e le afioga ia Asi Tuiataga Faafili Blakelock, o le Hai-Komesina mai Ueligitone.
O le tamaitai minisita o le Matagaluega o Tagata Atumotu o le Pasefika, Georgina Ta Heuheu, sa fai ma sui o le Malo o Niu Sila, o ia foi sa faia le saunoaga faapitoa mai ia Niu Sila, mo le faamanatuina o le Fu‘a o lenei tausaga.
Ona o le sauniga faalemalo ma lana fuafuaga faagasolo, ua talimalo ai Aukilani i lenei tausaga, ua foliga mai ai ua masuiga mālie ai foi ma lea lava mataupu sa fai ai foi sina va o le fogavaa i finagalo o le atunuu.
O se faatofala‘iga ma le mau tauave a le atunuu, i le ava fatafata ma le faaaloalo aemaise o le agaga saili malo, sa iu i ai le feiloaiga a le sui o le malo, le afioga i le Konesula, Faolotoi Reupena Pogi ma le taitaifono faapea le mamalu o le laulau, aemaise le Fono Faufautua a Samoa i Aukilani, na malilie faatasi ai o le a tapena e le malo le faamoemoe mo lenei tausaga.
E lē toe tau faailoina, e pei ona masani ai mai tausaga ua mavae, o le Fono Faufautua lava a Samoa i Aukilani, sa nafa ma le faapolokalameina o lea aso tāua. E lē gata i lea, ae sa faataunuuina foi le Tutoatasi o Samoa, i le aso mālōlō o le Tupu Tamaitai o Elisapeta, i le tuanai ai o le aso muamua e pei ona faataunuuina i laufanua o le atunuu.
O lenei tausaga ua fai ai o le talosaga a le malo, ma ua lolo i ai finagalo o le Fono Faufautua, i le fai lea faalemalo o le faamoemoe i lenei tausaga. O le aso muamua o Iuni, a o le Aso Lua lea o le vaiaso na tuanai, na faataunuuina ai le faamanatuina i Aukilani o le malo tutoatasi o Samoa.
