Atonu e lei umi se taimi na tuufaatasia ai le faamoemoe o le Taligamalo lea sa faatautaia e le Iuni Lakapi a Aukilani Samoa ma le mamalu o le atunuu sa lagolago i le po o le Aso Faraile, auā se tali atu ma le loto faafetai ma le agaga ua faamalieina i le au Lakapi Taitoafitu a le atunuu lau Manu Samoa, peitai e pei o se taumafaiga ua loa ona tapena ona o le maualuga o lea afiafi i soo se vaega o le faamoemoe.
O le afioga lava i le Peresitene, Aiolupotea John Roache ma le Komiti faafoe o le Iuni Lakapi a Aukilani Samoa na faamaopoopoina le faamoemoe tāua, ma tauaaoina ai le seleni e $10 afe Niu Sila mo le aumalaga, faatasi ai ma le tele o faaaloaloga tau seleni i sua na mafai ona tuusa‘o lava i lima o le ‘au e tauala atu i nai o latou lava aiga, lea e iai le talitonuga e ono oo atu lava i le $20 afe pe a tuufaatasi.
O i na maitauina ai le fiafia ma le faagaeetia o le atunuu ona o le tulaga maualuga ua iai le Taitoafitu a le atunuu lea ua agiagia ai le tagavai o Samoa ina ua suipi i le Taamilosaga o lenei tausaga atoa.
O le Susuga i le Faafeagaiga ia Ata Milo o le EFKS Otahuhu sa saunia le faigalotu e amata ai le po fiafia ma ave faatasi ai le faamua i le Atua ona ua a‘e malo le faiva o tamafanau.
O nisi o saunoaga faapitoa o le po e aofia ai le Hai-Komesina o Samoa i Niu Sila ia Tuiataga Asi Semisi Blakelock, o le afioga i le Konesula ia Faolotoi Reupena Pogi, faapea foi tamalii Samoa o loo i le Kapeneta a Niu Sila ia Su‘a William Sio ma Peseta Lotu Iiga, na maualuga ai lava le faamoemoe o le afiafi.
Na amata lava le saunoaga a Su‘a i le lagiina faatasi o le Pese masani a Samoa, “ua faafetai ua faafetai, ua malie mata i vaai”.
O le Fofoga o le po o le Sui Peresitene o le Aukilani Samoa le Afioga a Vui Vitale Sapa‘u, faatasi ai ma le tele o faafiafiaga faa-Samoa na saunia e ausiva ma alo pepese o le atunuu.
E ui lava i le seleni e $15 na ulufale ai i Malaeola, ae sa lē faavaivai ai le mamalu o le atunuu na taupati atu e fia faatalofa ma feiloai i toa o le atunuu.
O se tasi o vaega na faate‘ia ai le aumaimoa, ona o le totogi faapitoa lea o le Limousine e aumai ai le ‘au ma susuga i Faiaoga mai le faletalimalo i Malaeola, ma toe momoli ai ina ua mae‘a le po.
E fia momoli le faafetai tele i le Komiti ma le Iuni Lakapi a Aukilani Samoa mo tapenaga uma o le afiafi, e ui e lei umi se taimi sa tau tuufaatasi ai, na taunuu le ‘au mai Peretania i le Aso Lulu ae fai le Taligamalo i le Aso Faraile.
Ia ae lē ‘asa lava foi ni faiva ma se maimau e pei o upu masani, e iai lava foi lape o soo se faamoemoe, ia ae o le agaga lava ia o le Komiti ma le Iuni Lakapi, ia maua se avanoa e faaali ai le agaga faagaeetia ona o au tamafanau Samoa. Malo le lotonuu.
