Ua silasila mamao le Malo o Samoa i le tatau loa ona tatala le faitotoa e faaulufale ai nisi kamupani mai fafo e gaosia le eletise ina ia mafai ai ona taugofie lea auaunaga mo le atunuu, ma ia mautinoa le lelei o le faatinoga o lea auaunaga mo tagata lautele aemaise o pisinisi ma kamupani o loo faaaogāina le eletise ia latou auaunaga.
“ O le naunautaiga lena o le Malo o iai nei, ma pasia loa le tulafono taufaaofi e faatu ai se ofisa tumaoti o se Pule Faatonu na te faatulafonoina le tau o le eletise faapea galuega uma tau i lea auaunaga ona tatala loa lea o le avanoa mo isi kamupani gaosi eletise e faagaioia ai i Samoa”.
O le finagalo lea o le Minisita o le malosi tau eletise le afioga Tuisugaletaua Sofara Aveau ina ua tāpā sana faamatalaga i le faamoemoe o le Malo e faatu se ofisa o se Pule Faatonu poo se Regulator mo le nafataulimaina o auaunaga ma malosiaga faaeletise i le atunuu.
Na faaalia e le minisita o le a tumau pea le auaunaga a le Faalapotopotoga o le malosi faaeletise le EPC aua o le a gafa ma le faafoeina o afi eletise o loo iai nei faapea se fale eletise fou o le a faatu i Fiaga.
“O le tau o lea atinae tele e selau miliona tala Amerika ma e tatau la ona faagaioi e le EPC lea atinae ina ia mautinoa ia saili ni seleni mai lea auaunaga e toe faaola ai seleni o le a faaalu i lea atinae tele o loo fuafuaina”, na saunoa ai le minisita.
O le taimi nei e pei ona saunoa Tuisugaletaua i le faatalatalanoaga ma le tusitala, ua taoto se fuafuaga o se isi atinae tele a le EPC o le faatuina lea o se nofoaga e maua ai le eletise mai le la poo le solar system.
O lea fuafuaga pe a mautu ma amata faaaogā, o le a maua ai e le tasi vae tolu o le atunuu i Upolu ma Savaii le eletise.
O loo iai se kamupani i Niu Sila e lei faailoaina mai e le Minisita o loo galulue faatasi ma le EPC i le tuufaatasia o lea fuafuaga.
O le faatuina o se ofisa o se Pule Faatonu mo le fuafuaina o le tau o le eletise i Samoa o le a nafa ai foi ma le tuuina atu o laisene i pisinisi ma kamupani o le a mafai ona gaosia le eletise ma faaoo atu i le atunuu lautele, ma o se auala lea na ta‘ua e le minisita o le a maua ai se eletise taugofie.
Ua iai nei le Pule Faatonu mo tulaga tau fesootaiga e pei o telefoni, ma ua maua ai ni tau taugofie mo tagata i lea auaunaga, ma o le autū foi lea o le faatuina o se ofisa o se Pule Faatonu mo le malosiaga tau eletise.
Ua mae‘a ona pasia i le faitauga lona lua le Tulafono ua fuafua le Malo e faatu ai se ofisa o le Pule Faatonu ma ua see atu nei i se komiti faafoe faapalemene mo le toe lauliliuina ona toe foi ai lea i le Maota Fono mo le pasiaina i le faitauga faatolu.
