Ua tini lau o le faamoemoe e pei ona malaga mai ai le afioga i le alii Palemia o si o tatou malo ma le aumalaga auā le faamanatuina o le 33 tausaga talu ona tu mai le paeaiga a le faigamalo ale HRPP.
Na toai taunuu i le aai i Brisbane i le taeao o le Aso Toonai 20 o Oketopa ma amata loa i se sauniga lotu sa taitaia e le Peresetene o le Mafutaga a le Leo o tagata Samoa i Logan, Tofa ia Faimalotoa Ioane Pale.
Na tatalaina e le Toomaga mo e Puapuagatia (Samoa Victim Support Group) o le isi lea o ‘auga o aute na saunoa i ai le taitai o le atunuu. Na talatalaina e le Peresetene ia Lina Chang mai Samoa le tāua tele o le oo mai o lea faalapotopotoga i Brisbane e fesoasoani ai i ni tina o mafatia pea i sauaga aemaise foi ni tama o loo iai pea tulaga o le tuinanau auā o le upu moni e le natia le mea moni. E leai foi se mea e lilo.
O le fetalaiga ia Leautuliilagi Sogialofa Malaeoalii Vaa Leapai sa faaleo ma faatino ni faaaloaloga mai le Toomaga mo le afioga i le alii Palemia ma le aumalaga a le HRPP. Na saunoa foi le Peresetene ia Lina Chang i se lauga autū e talatala foi le tāua o le Toomaga mo e Puapuagatia, faapea le lala a le faalapotopotoga lea ua ofi mai i Brisbane.
O le faletua ia Veve Campbell o le Peresetene o Kuiniselani faapea le faletua ia Eseta Frost o ia o le failautusi, ae o Samoa lava e iai le faauluuluga o le Toomaga, ona faagasolo lea o polokalame ua leva na tapena i ai le komiti sa tofia mo lea faamoemoe, faapea Tumua ma Pule.
O le susuga ia Moefaauo Agaimalo Toetu Milo na fai ma sui e tali fuaitau i le saunoaga amata a le alii Palemia Tuilaepa Sailele Lupesoliai Malielegaoi.
Na vaavaalua le susuga ia Moefaauo Agaimalo Milo ma le susuga ia Tolofuaivalelei Falemoe Leiataua e faatautaia le aso atoa.
Na faagasolo le tele o polokalame ma feula foi le keke o le aso fanau. Tele malo faaaloalogia, e pei foi ona auai le afioga ia Samau Tate Simi, o le Komesina o Samoa i Canberra.
E to‘a 20 le aumalaga ma o loo api i le nofoaga a le mafutaga a le Tofa Mamao i Dinmore.
Momoli foi le agaga faafetai i le komiti le afioga ia Tauiliili Itaotemai Sugi Pepe Patu o ia o le Peresetene, failautusi Moefaauo Agaimalo Toetu Milo ma nisi o tupu ma tamalii sa tautua matavela i nisi vaega auā le faatalia o le faigamalaga.
Ua na o se aofai lata mai e $42,000.00 (e lē o tauina ai le tauofoga $5000.00 a Dean Bazvand o le Primoz Motors) e $47,000.00 i ai se seleni pe a tuufaatasi. E 20 le aofai o le faigamalaga, o sui Minisita ma faipule na malaga mai faatasi ma le Taitai o le Malo.
O le taeao o le Aso Sa na faia ai se ‘ava o le faamavaega sosoo ai ma le toonai a o lei toe taliu le faigamalaga mo Sini ma sauni ai e toe taliu atu i Samoa.
O le fale‘aiga a le Paradise Taste (Tui & Rachael Vaimoso) sa feagai ma le fofoga taumafa o lea faamoemoe.