Ua atoa tino o le tama ma ua alalaga fiafia le fanau Kerisiano auā ua sosoo le fau ma le fau. O le taeao o sauniga lotu o le Aso Sa na tea nei (21 Oketopa 2012) na avea o se viiga mālie i le Ekalesia Uesiliana Metotisi Ausetalia i Inala, na osia ai la latou feagaiga ma le latou tofi fou, le susuga ia Rev Risatisone ma le faletua ia Faitauga Taufao, ina ua mae‘a le taimi sa galulue ai ma le susuga ia Rev Talaifeii Aufai.
Ua avea nei Rev Talaifeii Aufai ma le faletua ia Lily ma faafeagaiga Penisione Malolo Manumalo. Sa taitaia lava le sauniga e le Toeaina penisione malolo. O le faapaiaina o le Osigafeagaiga a le Ekalesia ma le Faifeau, sa saunia lava e le Taitai Aoao o le Ekalesia Metotisi Uesiliana i Kuiniselani, le susuga ia Rev Rex Rigby.
Sa fai le fofoga o Levaopolo na te molimolia le Faifeau i le Ekalesia ma faaleo foi tulaga masani. O le fetalaiga ia Talauega Faamalu na fai ma sui o le Ekalesia ma le auvalaaulia e faafetai le paia i aiga ona o tulaga masani.
