E ui lava i le taugata o le soifuaga ua iai lenei vaitau, aemaise i le itu o fualaau ‘aina, ae mautinoa o loo iai lava auala e saili i ai le tagata ina ia maua ai se fesoasoani e tau faamāmā ai le tele o se tupe faaalu i lena foi manaoga.
Ua fesoasoani mai le susuga i le alii faifaatoaga, le susuga ia Tuilaepa Kovati, e galulue soosootauau ma le Samoa Times, e faatulaga se tauvaga, mo le totōina o le maukeni. Ae silasila ane i le faalauteleina atili o lenei faamoemoe.
O le a faagasolosolo atu pea i vaiaso taitasi i totonu o lenei itulau o le “Lima Ola” le tele o faamatalaga ma fautuaga e fesoasoani i le faatinoga o lenei tauvaga.
Lima Ola
E faatalofa atu i le paia ma le mamalu o Samoa i ona tulaga faalupelupeina. Amata mai mauga iti seia pāia mauga tetele. Faamalo le soifua maua ma le lagi e mamā. Faafetai i le Atua i lenei avanoa ua aumai e tautua atu ai i le atunuu e ala i le fesoasoani i le itu tau faatoaga.
O tatou Samoa o tagata e galulue tele. O fua o faatoaga na amata atiae ma faavae ai aiga ma le atunuu. Ua omai i atunuu i fafo e pei o Niu Sila nei, ua lē toe faaaogāina taleni faifaatoaga e pei ona sa masani ai i Samoa.
O le autū o lenei auaunaga, ia toe unai o tatou tagata e totō fualaau ‘aina i tuafale. O le a aogā fualaau ‘aina e totō lava e oe i tua o lou maota e fesoasoani ai i le paketi (budget) a le aiga, auā ua faasolo ina taugata le tau o fualaau ‘aina ma le soifuaga.
Aiaiga mo le Tauvaga – Totōina o le Maukeni
1. Amata i le vaiaso muamua o Novema 2012, ae faaiuina ia Fepuari 2013. E eseese ituaiga fatu maukeni, ae lelei uma i le taumafa. E eseese foi lanu ma o latou foliga.
2. Tapenaga o le Eleele – Liuliu le eleele, tuu i ai faapalaga laulaau (compost) poo otaota o manu (horse or chicken manure), faafefiloi ma le eleele. E lelei foi le faaaogā o fetalaisa e faatau mai le Gardens Centre o le BLOOD & BONE.
3. Totō sa‘o ni fatu se 2 i le nofoaga ua filifilia e inisi le va o fatu. O le maualalo e faaluaina le umi o le fatu. Faataitaiga: a 1 le senitimita (1centimetre) le tele o le fatu, e tatau ona 2 senitimita le maualalo o le pu e totō ai le fatu. E 2 mita le va ona totō lea o le isi foi 2. A uma ona totō, ufiufi i le eleele ona fui lea. A ola fatu, faasao le maukeni malosi ae aveese le maukeni vaivai. Ia tasi lava le maukeni e faasao mai le 2 sa totōina i le nofoaga e tasi.
4. E 120 aso e ola ai le maukeni mai le aso e totō ai i le eleele seia oo ina fua ma matua.
5. E 7 faailoga o le laugatogi, mo le tauvaga maukeni: (1) Maukeni e pito mamafa (heaviest); (2) Maukeni e pito laitiiti (smallest); (3) Maukeni e pito sili le auleaga (ugliest); (4) Maukeni e manaia lona lanu (best colour); (5) Maukeni e foliga ese (best shape or interesting shape); (6) Maukeni e pito sili le teuteuina (best decorated); ma le (7) Le supo maukeni pito sili ona manaia i le tofo (tasty soup).
6. Faafofoga mai i le Radio Samoa 1593AM i taeao o Aso Lulu taitasi i le 7.10am i le polokalame o le ‘Mālu o le Taeao’, faafofoga ia Tuilaepa Reupena Kovati ma Tavai Meni. Faitau le Samoa Times i vaiaso taitasi i le itulau fou ‘Lima Ola’, mo nisi fesoasoani i le totōina ma le vaaiga o maukeni.
O le a iai faailoga muamua ma le lua i soo se vaega o vaevaega i le tauvaga. Mo i latou e fia o i le tauvaga, e te maliu atu i le ofisa o le leitio: 3/36 Hobill Ave, Manukau, e piki lau pepa fatu maukeni ua uma ona saunia, ma lesitala lou suafa, ma ave sau pepa o faamatalaga o le tauvaga.
O le vaiaso muamua o Novema e amata ai ona totō fatu maukeni. Ae o le taimi lenei e tapena ai le palapala. Sua faamalū le palapala, ave i ai ni compost poo palagā otaota e seu faatasi ma le palapala.
E mafai foi ona faaaogā otaota o solofanua & moa (horse or chicken manure) e seu faatasi i le palapala, poo fetilaisa maua i Garden Centres, o le Blood and Bones e seu faatasi i totonu o le palapala.
A mae‘a saunia le palapala ona totō sa‘o lea o fatu tailua e felatai pe inisi le va, tanu laitiiti na ona fia lilo a i le palapala. Luma mita le va ona totō foi lea o le isi lua. A ola loa ona filifili lea o laau malolosi e faasao le pea e tasi, ae aveese le laau vaivai. Pule oe pe fia le aofai o fatu e faasao, e faalagolago i le tele o le avanoa o lou togalaau.
A o faasolo vaiaso o le tauvaga, o le a faasoasoa atu ni fesoasoani i vaiaso taitasi e uiga i le totōina o le maukeni. O le a faamatala atu ai foi aogā eseese o le maukeni e lē gata i le kukaina, ae o le aogā i le tino o minerale ma vaitamini e maua mai ai.
O le avanoa lelei foi lenei e tauva ai aoga faataitai (Day Care Centres) ae tasi le latou lesitara. Ia manuia fuafuaga o lenei vaiaso. Mo nisi faamatalaga, faafesootai mai le telefoni 09 2353476 poo le 021 2536695. Tuilaepa Faiai Reupena Kovati.
Ia Manuia le alofaiva o le atunuu i le tatou Tauvaga, ma ia fua ma lauolaola lau Maukeni!
O le susuga ia Tuilaepa Reupena ma lona faletua, Eseta Kovati ua 25 tausaga o galulue i lenei tomai tāua o le Faifaatoaga (Farmers Horticulturists). Ua iai lo laua lava fale e faamili ma totō ai totonu nisi o a laau, Tam Yam Gardens (greenhouse).
E faapitoa lava a la faatoaga i le totōina o le tamato, polo feū, snow peas, beans (Pi sosolo), herbs, scallopini.
O loo sapalai mai le la faatoaga le MG market, ma sa masani foi ona la sapalaia mai le Turners and Growers. E te maua foi i laua i le maketi faatau poo le filī maketi a Otara i Aso Toonai. Ia Manuia le alofaiva o le atunuu i le tatou Tauvaga, ma ia fua ma lauolaola lau Maukeni!
