Na matuā faatumulia le faleaiga o Robbies Bar & Bistro i Kalaiesetete i le mamalu o le auvalaaulia aemaise aiga o le alii o Jason Fruean lea na auai atu i le faailogaina o le atoaga o le 21 tausaga o lona soifua i le aso 10 Setema, aemaise ai le tumutumu o tagata e maimoaina taaloga lakapi o le Ipu o le lalolagi.
O Jason na soifua mai ona tuaa o Auapaau Talosaga Fruean (Afega & Safune) ma lona tina o Launoa (Manono & Falelatai).
O ia o le uii mai ona tuafāfine e toatolu, ua faauuina mai le aoga CPIT ina ua ausia lona tusipasi o le tomai faapitoa e saunia ma kukaina meataumafa (chef).
Sa amatalia le faamoemoe i le tatalo faafetai faapea upu apoapoai na saunia e le susuga Fitiao Taliau, o le tiakono matua mai le ekalesia St Pauls Pacific Trinity Church, sosoo ai ma le molimau puupuu a lona tamā faatasi ai ma le tuuina atu o le ki o le 21 tausaga.
O nisi o upu timai a Auapaau Fruean i lona atalii, e tele luitau o le olaga ae o le mata‘u i le Atua ma ava i mātua, poto e alofa i soo se tagata, o le ki lena o le olaga faamalieina.
O Jason o se atalii talavou e agamalu ma le tausaafia peitai ina ua faauuina mai lona tusipasi kuka na malaga loa i Ausetalia ma galue ai ma o loo faatali pea mātua poo afea e faaali ai lana taleni kuka i totonu o le aiga. Na feulaina lana keke sa saunia lelei e ona tuafāfine na malaga mai Melepone, ona alo atu lea mo le taumafataga tele ma le felanulanuai.
O lea foi aso sa faatumulia vaipanoa uma o le faleaiga e lē gata o le auvalaaulia ae o tagata e matamata ma fiafia faatasi i le taamilosaga o le Ipu o le lalolagi, e ui lava ina misi atoa Kalaiesetete i ni taaloga e faia ai talu lenei mafui‘e oso faafuasei.
Maitauina e le tusitala le matagofie o le aso tuupoina talu ai ua o faatasi le matagofie o tapenaga a nai mātua ma le fiafia o tagata na lolofi atu e matamata i taaloga lakapi aemaise sauniga o le tatala aloaia o taaloga i Aukilani.
Sa matuā faamalieina le valaaulia i feleiva eseese o le taumafataga. Sa liliu ane foi le mamalu o le aiga i faiva o faaaloaloga maualuluga pei ona iai nai meaalofa saunia mo le susuga i le failotu, faapea le paia lasilasi o le valaaulia na auai.
E faamanuia atu ai le tatou nusipepa o le SamoaTimes ina ia manuia tele le aso soifua o Jason Fruean, ma talosia ia fetaui le Manu Samoa ma Niu Sila i le sailiga o le siamupini o le Ipu o le lalolagi.
