O le uluai taimi lenei ua faia ai e le Ekalesia Molimau a Ieova ia latou faapotopotoga o le itupa Samoa, sa latou tauaofiaga ua atoa uma aso e 3, i le gagana Samoa i Ausetalia, ma o se matati’a fou lea ua ausia e faapotopotoga faa-Samoa o Molimau a Ieova i lea atunuu.
O le Aso Faraile i le Aso Sa, 16-18 o Setema 2011, na usuia ai lea tauaofiaga, ma sa auai mai ai le tele o molimau a Ieova mai i faapotopotoga i Pirisipeni, Melepone ma Sini. Sa auai mai foi se tasi o sui mai le ofisa faaliliu a Molimau a Ieova i Samoa, ma faia ai ni lauga i le tauaofiaga.
O le aofai o i latou na auai i le tauaofiaga e 482, o se aofaiga sili lenei mo tauaofiaga a Molimau a Ieova i le gagana Samoa i Ausetalia.
O le matua o lenei tauaofiaga na faavae i upu o le tatalo faaa’oa’o a lo tatou Alii: “Ia oo mai le Malo o le Atua”, ma sa avea lea ma ‘au’au o lauga, faatalanoaga ma faataitaiga uma o le polokalame.
O se tasi foi o vala mataina o lenei tauaofiaga, o tala faale-Tusi Paia na faatinoina, ina ia maua ai lesona tāua e fesoasoani i talavou Kerisiano i aso nei.
O le tala i le Aso Sa na faataitai ai le faaa’oa’oga lelei a Iosefa i le sola ese mai le avā a Potifara; ma le auala e mafai foi ona faia ai faapea e talavou i aoga i aso nei.
E nofo tatali foi sui auai o le ekalesia ia latou faatasiga tetele nei, auā o taimi foi ia e tatala aloaia ai nisi o a latou lomiga fou faale-Tusi Paia, ina ia fesoasoani i la latou galuega talai ua lauiloa ai; ma o se tasi foi o lomiga na fuafua patino lava mo talavou.
I lenei tauaofiaga na papatiso ai le to‛a 6 o sui fou, o i latou na filifili e faaalia lo latou tuutoina atu faia e finagalo o le Atua, e ala i le papatisoga i le vai.
Faailoa e le susuga ia Tim Ioramo (o le sui o le News Services o le tauaofiaga): “O faatasiga faapenei o se avanoa matagofie e faamalosia ai lo tatou faatuatua i le Malo o le Atua.
O le agaga faataulaga na faaalia e le toatele o le auusufono, aemaise i latou na malaga mamao mai i isi setete, ma le tele o tapenaga sa faia e aiga ma fanauiti, e faailoa ai le tāua tele o nei tauaofiaga i tausaga taitasi.”
