I le agaga faaaloalo e faafeiloai atu ai i le paia ma le mamalu o si o tatou atunuu aemaise le mamalu i le aufaitau o le Samoa Times. Malo lava le soifua.
E talitonu le agaga o loo faapea ona agalelei pea le Atua ma tului le soifua laulelei.
O loo tatou iai i le vaitau o tausinioga o le Lakapi a le Lalolagi ma o se taimi mataina foi i totonu o Niu Sila aemaise lava Aukilani ona o le lotonuu o o tatou tagata e ala i lana tapuaiga i le alo atu o le Manu Samoa mo le faagatama.
E leai se vaipanoa o le alatele e lē vaaia ai fu’a poo tagavai o lo tatou atunuu i luga o taavale, o lumafale o aiga, o autafa o le alatele.
O nisi ua vali a latou taavale i le fu’a o Samoa, e oo foi i taualuga o fale ua valiina apa i le fu’a o Samoa. Ina ua manumalo le ‘au i le vaiaso na tea nei i le taaloga ma Namibia, na leai se Samoa e toe nofonofo lelei i le fiafia ma siva ma pese. Peitai ina ua malolo la tatou ‘au i le Aso Sa na tea nei, ia ua tau leai foi se fiafia.
Ia o le soifuaga lava e faapea. I totonu o le ekalesia e iai taimi e manumalo ai e iai foi taimi e faia’ina ai.
E iai taimi e fiafia ai tagata ma toaaga e faamaopoopo ma galulue. Ae a oo ina faia’ina e fiu foi e toe autilo.
O le fesili e tulai mai i loto o taitai o le ekalesia e faapea, “E faapeafea ona taumafai le taitai ina ia maua le lagona manumalo i finagalo o tagata ae lē o le toilalo”.
E mafai foi ona faaupu lenei lava fesili e faapea, “O ni mea e maua ai le lagona faia’ina o le ekalesia ae o ā foi auala e maua ai le lagona manumalo o le ekalesia”.
E maua le lagona faia’ina i loto o tagata pe a tutaia le ola auauna ona o faafitauli. E lē gata i lea ona o le lē lelei o le faafoeina o le taitaiga.
Ona maua ai lea o le lagona palaai pe musuā ma le lē faamalosi e fai se mea ona e iai le manatu pe a tua ma ni a, tulaga o loo aafia ai le ekalesia?
O se tasi o tiutefai o le taitai o le taumafai lea e faalototeleina tagata o le faalapotopotoga poo le ekalesia. E lē gata i faamatalaga ae o auala faatino ina ia aveesea ai le masalosalo ma le lē mautonu i loto o tagata.
Fai mai le tala a Iakopo o le tagata e masalosalo e leai se mea e mautu na te faia. (Iakopo 1:8) A oo ina masalosalo ma lē mautonu le ekalesia i le taitaiga e faapena foi ona lē mautu se mea e faia.
O se tasi fesili ona tulai mai e faapea, “E faapefea ona fesoasoani le faifeau poo le taitai ina ia aveesea le loto masalosalo”? E pei ona ta’ua i luga e tatau ona faalototele i tagata.
Lua e tatau ona manino le alafua o loo taitaiina ai le galuega poo ala o mea. A manino mea uma ona leai lava lea o se masalosalo.
Sa tuuina mai ia te au se fesili i se tasi aso e uiga i le tala o tupe a se tasi ekalesia ona ua atoa lava le 5 tausaga o loo lolotu lenei aiga e leai lava ma se tala o le tupe e faia.
Na fesiligia le faifeau ae o le tala a le faifeau “Ua iai se mea ua faaletonu i le tupe a le ekalesia ua fesiligia ai le faifeau”. Ou te lei fesili i le faifeau i sona lagona auā e lē o sa’u feau lea tulaga e fesiligia ai.
Ae o lagona faapea i tagata e tupu ai le masalosalo.
O loo tatou talanoa pea i le tatau ona totogi le faifeau ae poo le ā foi le auala e faaoloaina ai le auauna a le Atua.
Ou te talitonu e tatau i tagata o le ekalesia ona malamalama i le faaoloaina o le faifeau.
O le tele lava o tagata e lē popole i lea itu ae afai e fesiligia, o se tulaga tatau lea. Aua a lē lava o ai e pa’ūu i ai? O le ekalesia. A tele foi o ai e pa’ū i ai? O le ekalesia lava.
Ua tatou ioeina le tatau ona faaoloaina le faifeau ae ia tatau ona faia ma le tonu, ia lelei ma talafeagai le tausiga o le faifeau, ia faia e tusa ma tulafono a Niu Sila poo Ausetalia, poo Samoa foi aemaise o le usitaia o le finagalo o le Atua e ala i le Tusi Paia.
I se tasi o ekalesia i totonu o Aukilani sa tuuina mai e le faifeau ia te au se maliliega tusitusia ma le ekalesia i le tausiaga o ia ma lona aiga. O le ekalesia lenei e lē atoa se 100 tagata.
O le faaupuga lenei o se feagaiga pe afai e faaaogāina lena upu poo le maliliega i le va o le faifeau ma le ekalesia. E talitonu o le a fesoasoani lea i nisi o ekalesia e moomia lea fesoasoani.
1. O le Valaauina
O le valaauina i le galuega faafaifeau o le mea patino lea a le Agaga Paia. E ala lea i le taitaiga a le ekalesia ma ona tagata lolotu faapea ai ma le lagona tautino o le faifeau o ia ua valaauina e le Atua i le ekalesia mo lona finagalo.
O lenei valaauina e aafia ai se mafutaga vavalalata a le faifeau ma le ekalesia e ala i le Agaga Paia.
O le valaauina faafaifeau e lē o se mafutaga o se tagata faigaluega e pei ona iai aiā tatau ma galuega tausisia e pei ona iai i se maliliega faafalefaigaluega.
O le matafaioi tausisia a le faifeau o le Atua lea, o ia na valaauina o ia i lenei galuega.
Faaauau i le vaiaso a sau
Lui Ponifasio
www.luiponifasio.wordpress.com
