Letioa a molimau le Tusi Sā, o se avā amio lelei, o ai sē ua maua? E silisili lona tau i penina. E tulai mai lana fanau ma faafetai ia te ia. E toatele fafine e amio lelei i latou, a o oe, ua faasilisili oe ia i latou uma.
O le afiafi o le uluai aso, 11 o Mati na tuufaatasia ai ma faatumulia le matagaluega Aso Fitu Samoa Tutoatasi, aiga ma uo mamae i Logan City e molimauina le faamanatuina o le 75 tausaga o le faletua manumalo malolo ia Matagi Kitiona Sione.
(O ona tuaa, o si ona tina e mai Tanugamanono ma Nuuuli Amerika Samoa faapea si ona tamā mai Safune i Savaii ma le motu o Tonga).
Sa faaipoipo atu Matagi i se tasi foi o toa o le talalelei ua fai i lagi le folauga, le susuga ia Pr Kitiona Sione sa avea foi ma Taitai Matagaluega i tausaga ua mavae. Ua tele tausaga sa faaaogā ai lo la soifua galulue mo le galuega a le Matai.
O le toalua o se vaega o le nofoaalo o loo sosooina pea le fau e ala i le galuega tala‘i e pei ona iai le susuga ia Pr Lama Pita Sione o loo galulue ma le faletua ia Eseta i le Ekalesia Aso Fitu Samoa Tutoatasi i Sini, o ia foi o se teuoloa aoao i le galuega a Ausetalia. O lona alo tamaitai o Puataunofo Levae, o le faletua lea o le Taitai matagaluega SISDAC a Kuiniselani, Pr Lagolago Levae, o i laua foi ma le nofoaalo o loo feagai ma le tausiga o le faletua manumalo ia Matagi Kitiona.
E ui lava ina malolo mai le galuega peitai e lē o tuua ai lona soifua tautua lotu aemaise o se faufautua malosi i nai ona alo ma aiga o loo i le galuega.
O le susuga ia Lama Pita Sione sa fai ma fofoga o aiga na lua e faatautaia le po fiafia o si o latou tina.
O alofaaga e lē mavae mo oe le tina Matagi Kitiona Sione mai le nofoaalo. Faafetai tele mo galuega lelei uma sa e faia i aso e tele. Pr Lama Pita & Eseta Sione ma le nofoaalo; Vaimoana & Satia Sio ma le fanau; Isalei & Lafaele Iusitino ma lefanau; Sesilia & Eli Tavui ma le fanau; Faletua ia Puataunofo & Pr Lagolago Levae ma le nofoaalo ia Alice, Matagi, Marie ma Kitiona Jr; faapea Iefata & Saunoa Sione ma le nofoaalo.
E molimoli atu ai foi ma faamanuiaga mai le Matagaluega atoa SISDAC a Kuiniselani, aiga faafeagaiga ma faletua, ma le loaloa o le matagaluega. Alolofa atu foi le pulega a le Penina o Asuisui, ma ia manuia tele lou aso soifua Matagi Kitiona Sione. Ia saga faaopoopo pea e le Atua nisi tausaga se tele o lou soifua Tina.
