Ua tonu nei lau, o le malumalu tele o le Cathedral lea sa fai ma fatu o le taulaga o Kalaiesetete, ma mamanuina i fausaga o le malo o Peretania 130 nai tausaga ua faaalia e le faauluuluga o le Ekalesia Anglican, Bishop Victoria Mathews, faatasi ma se manatu o le minisita o faalavelave faanatura, Hon Brownlee, o le a tuu i lalo le fale ona ua lē saogalemu talu mai le mafuie 6.3mg aemaise le osofaiga i le aso 23 Tesema 2011.
E ui ina fetosoai manatu o le lautele pe lē mafai ona toe lipea talu ai o se measina tāua a le aai, peitai na faaalia e nisi, na fai malumalu e lolotu ma tapuai ai, ae lei faia e teu ma faamatagofie ai ni aai ma ia faamuamua le soifua saogalemu.
E ui ina iai nisi faatalosaga mo se toe avanoa o le alii inisinia mai Saina ma Europa e toe suesue atili ai pe mafai ona toe lipea ae ua faataatia ese, talu ai ua lē toe mafai i ai se isi togafiti.
E tusa ma le 32 afe le aofai o tagata na maimoaina le Cathedral Square i le faaiuga o le vaiaso lea na uluai tatala ai avanoa mo le lautele, o le vaiaso fou e faagata ai nei avanoa e pei ona faatagaina mai e le CERA.
O se mau mai le alii tautaua o le aai, Wizard of Oz lona matua le lagolagoina o le tuuina i lalo o le fale, ua faapena ona auautasi i ai nisi o tagata, ma fai mai a latou, o le aso e faataunuu ai le faamoemoe o le a latou tutufaatasi ma saisaitia i uamea agai i le falesa e faaalia lo latou tetee, ia poo se latou valevale alofa i le malumalu ua fai ma fatu o le aai.
Peitai a o iai pea feeseeseaiga o lagona agai i le Cathedral, o le malumalu a le ekalesia St Pauls Pacific Trinity Church lea foi na matuā iloga ona faaleagaina i le mafuie i le taulaga, e ui ina mafatia si aulotu lea sa taitaia e late Rev Lapana Faletolu, ae ua vaaia nei e Rev Walsh ma le susuga Samoa Mavaega.
O loo to‘a pea le tai ma mau le toovae i finagalo o le mamalu o le ekalesia, ua avanoa le eleele sa tu ai le malumalu, ma ua faamau faailogaina i le tulimanu o le fanua se laupapa e tusia ai upu faamafanafana faatasi ma maa e 185 ua valiina paepae e faailoga ai i latou na maliliu i le faalavelave.
