“O le tele a o taimi e tusi e le vaega la e i le nusipepa ae pepelo. O le mea la lena e faaigoa o ghost writers poo ghost name, mo mea o agaga leaga, mo mea o aitu”… Palemia
O le tulafono e faamalosia ai nusipepa ona faailoa tagata e maua ai ni faamatalaga poo i latou foi e tuuina atu ni faamatalaga i se nusipepa, na pasia e le Palemene i le tausaga e 1994 o loo fai pea ma faamata‘u i pisinisi tau nusipepa, ona e afaina ai le saolotoga e faailoa ai faamatalaga e tatau ona silafia e tagata lautele.
Ua faamatalaina e le Palemia le tāua o lea tulafono o loo finauina e tusitala ma tagata faasalalau i Samoa, le tatau i le Malo ona soloia ma aveesea, e avea ma matu palapala i le fulisia o tusitala ma le aufaasalalau e faatuina se itutino e ave i ai faaseā a le atunuu i ni faaletonu e tulai mai i le faatinoga o le latou foi auaunaga.
I le finagalo o le taitai o le Malo ua faasalalauina i lana faatalanoaga tai vaiaso i luga o le alaleo leitio a le Malo, ua ia faamatalaina ai le tāua o lea tulafono ma e lē o iai se fuafuaga e soloia.
Faaalia e le Palemia, susuga Tuilaepa L Sailele Malielegaoi, o se tulafono o le a mafai ona ave ai se nusipepa i le faamasinoga ma faatonuina ai le faailoa atu o aitu o loo tuuina atu faamatalaga latou te faasalalauina.
O le finagalo o le taitai o le Malo e faapea, o aitu ia e masani ona ta‘ua e nisi nusipepa ae e tusia ai se suafa o se isi tagata.
“Se‘iloga lava e manaomia e se isi o le atunuu ona faaaogā lea o le tulafono lena. Manatua foi o le tele o nusipepa e tilotilo atu i ai i se isi aso ua tusi mai ua sau se faaleagaga lava o oe, ua tusi mai ai le igoa o Loata ae lē tusia sa‘o maia le igoa. O le tele a o taimi e tusi a e le vaega la e i le nusipepa ae pepelo.
O le mea la lena e faaigoa o ghost writers poo ghost name mo mea o agaga leaga mo mea o aitu”.
“Manatua la e te silafia lelei o le aitu e te lē iloa foliga ma e lē iloa foi tusitusi, o le agaga la o le tulafono e sue uma mai aitu ia, e matuā ave le nusipepa ae fai le faamasinoga ae ta‘u uma mai aitu ia na tusia le faamatalaga lea, poo agaga leaga. E tele a agaga leaga ia e feoai i le lalolagi.
E mafai la ona faaupu le tulafono o le tulafono kerisiano, o le tulafono lea e taumafai le Malo kerisiano se‘i saili mai aitu o agaga leaga ia e fai ma a latou amio le omai fua i lo tatou lalolagi ma fai ai a latou tusitusiga”
“E lē o se mea leaga la auā o loo iloa lelei a e le au fai nusipepa le au agaga leaga lea e fai ma alatou amio le tusitusi ma aumai ni mea leaga i se tagata. E lelei a pe a aumai ae o ni mea mo‘i ae a aumai o ni mea e lē moni o le mafuaaga lena lea e iai le tulafono lea.
O le tele a o taimi tate tilotilo iai ma ta ita iai ma kope a ta fualaau o le onosai”. O se vaega lea o le finagalo o le alii Palemia na tali ai i le mafuaaga o le le aveesea o le tulafono o loo finau atu le au tusitala ma le au faasalalau e aveesea.
O le faaiuga a le Kapeneta e talia le fautuaga a le Komisi o le toe fuataina o tulafono e soloia se tasi o tulafono e mafai ona molia ai se tusitala pe a faamaonia ni tuuaiga o le tau faaleaga, ua faafetaia ai le Malo peitai e talitonu le au tusitala e le mafai ona atoatoa le taua o le itutino o le a ave iai ni faasea faasaga ile galuega a tusitala peafai e le aveesea uma tulafono o loo tuta’ia ai nisi o vaega o le latou tautua.
O se tasi o taiala o lea galuega, e le mafai ona faailoaina se tagata e maua mai ai ni faamatalaga peafai e le finagalo iai sea tagata. E vagana ua poloaina e le faamasinoga peafai o se mataupu ua tuuaia ai se nusipepa, se leitio, ma se televise ae e fuafua foi le usitaia o sea poloaiga pe afai ua malie sea tagata e faailoa o ia, ae afai e lē manao i ai lea tagata, o le mau tauave ma le tautinoga faaauro o le galuega ia faatumauina pea le natia o le faailoaina o se tagata na maua ai ni faamatalaga tusa lava pe faasalaina ai se tusitala i le nofosala i le falepuipui.
