Mo vaiaso e lua na feagai ai se faalapotopotoga e ta‘ua o le Aiga mo Keriso (Home for Christ) ma ni aoaoga o tamaitai mo le afioaga o Vaitoomuli. O se aoaoga ua taulai i le faamalosia o le tulaga o tamaitai i totonu o aiga, totonu o nuu ma ekalesia.
O se taumafaiga ua faagasolo i afioaga o le motu tele i Salafai ona o le manaoga o le malo o Ausetalia e unai le tomai o tamaitai i soo se tomai a o feagai ai ma le tausi aiga. E lē gata mo le faaleleia o aiga i le itu tau i le tausiga ae faapea foi i le tupe maua.
O le auga atoa o le aoaoga lenei ua aoao ai le su‘isu‘i, o le gasesega o taumafa, o le tuiina o teu fugalaau, o le faatinoga o isi galuega taulima ina ia maua e tina ua fai aiga ma tamaitai talavou ua iu aoaoga ae e lē o maua ni galuega, le faamalosi ma le talitonuga e mafai lava ona o latou tulai mai ma taitai aiga ma aulotu aemaise o afioaga i tomai nei ma mafai ai ona aveese le ola faalagolago i alii poo tamā o le aiga mo se latou tupe maua ma faaitiitia ai le manatu e leai so latou aogā.
E tele afioaga ua fuafua e faatino ai lenei galuega ma o le faaiuga o le lua vaiaso na auai atu ai loa i latou na valaaulia o le ofisa o Ausetalia atoa ai sui o le faletupe o le Westpac na faatautaia aoaoga i le pulea o tupe ma le faasoa lelei pe a faatu ni atinae tau pisinisi a tamaitai. E lē gata i lea o le faitautusi ma isi tomai e moomia e tina i le numera auā lava le faamalosia o lo latou siosiomaga aoaoina.
Faaalia e Pastor Morgan Gegera o le faalapotopotoga ua faia lenei aoaoga, ua iai se tinoitupe e tusa ma le $2miliona (tala Samoa) ua faamatuu atu e le Malo o Ausetalia ina ia faagaioi ai nei aoaoga i afioaga o le motu o Savaii.
O le alii faifeau lenei e faaipoipo atu i se tamaitai Samoa ma ua o la faatuina se aulotu i Savaii ma ua unai ai foi atinae ma aoaoga e mafai ona saili ai galuega i le toatele o tupulaga talavou. O se tasi la lenei o taumafaiga ua taulai sa‘o lava i tamaitai lea ua o latou faatautaia mo le malo o Ausetalia.
O le afioaga o Salelologa ua mae‘a le aoaoga faapea a ona tina faapena foi isi vaega o le Faasaleleaga lava, ma o Vaitoomuli la lea ua mae‘a ma na faia se asiasiga o galuega ua mae‘a faatino e tina e ala i aoaoga ua tuuina atu.
Faaopoopo i le faauuina ma tusipasi ua mafai ai ona faamaonia le tomai ua maua e tamaitai, ua tuu ai foi ma laau su‘isu‘i e 12 na faatino ai nei aoaoga auā le faaauau ai ona faaaogā e tina ma tamaitai ua iai le manaoga e saunia laei mo le faatau atu i vaega eseese o Savaii.
E tele lava auala ua unai ai le tulai mai o tina ma tamaitai ma ia maua le tomai ina ia aveese ai lagona maualalo ua faapea ona molimauina pea i le tele o tamaitai e leai se tupe maua i totonu o le atunuu, ma o le manatu a mafai e tina ona iai se sao i le tausiga o aiga ma le atinae i totonu o nuu, atonu o le a fesoasoani foi i le aveesea o uiga faailoga tagata o loo vaaia pea i le tele o tamaitai e lē o maua se totogi ma o loo faamoemoe pea i le itupa o alii mo le tausiga o i latou.
