O le faaafe a le Ofisa o Amerika i Samoa i fanau a le atunuu ia na malaga mai mo faalauiloa o le taaloga lakapi Amerika ma le taumafa tatau ma le soifua maloloina, na faalauiloa ai e le Sui o lea Malo i Samoa o Peter Gangser ni avanoa sikolasipi o le a amata ona avanoa mo tama ma teine aoga o Samoa.
O le tele o tausaga o avanoa sikolasipi mo aoga i fafo na amata lava e Niu Sila sosoo mai ai ma Ausetalia ma na faatu loa le Iunivesite o le Pasefika i Saute i Fiti ma faatu ai lala o lea aoga i Suva, Alafua, Papua Niu Kini faapea ai ma Vanuatu i le aoga faaloia, o iina na ta‘ape ai loa foi ma avanoa nei ma ua toatele atili ai fanau ua maua ia faamanuiaga.
O lea ua iai le Iunivesite Aoao o Samoa ua agai i ai isi ae o isi malo e pei o Saina, Iapani ma isi itu o Asia ua tatala mai foi avanoa faasikolasipi, ae ua tele lava ina ave avanoa a atunuu ia mo i latou ua galulue ae o loo iai le manaoga e faaauau ona suesue i isi tomai o loo maua le avanoa e faalautele ai i fafo.
O avanoa la ia ua faalauiloa mai e Amerika o avanoa ina ia aoaoina ai i Iunivesite eseese o lea malo tele ma ua amata i le tausaga lenei e faatino ai suega ulufale mo ia aoga tetele.
E ese mai i avanoa ua tatala mai i Amerika ua iai le taumafaiga a le aumalaga a tama taaalo lakapi Amerika e saili foi avanoa mo fanau mai i Samoa i lea taaloga ae na ta‘ua e Leuluaialii Paul Soli‘ai ma Isaako Aaitui, o se alii sa aoga i le Kolisi o Leifiifi ae ua avea ma se tasi lauiloa i lenei taaloga i Amerika i lenei vaitaimi, e lē faigofie nei avanoa talu ai le manaoga muamua lava ia manuia le ola aoaoina o soo se tama e ofi atu i lenei taaloga.
O le lelei lava foi la o le tama taalo e fuafua uma i lona tomai i aoga i totonu o Amerika ma e toatasi se alii aoga sa taitai i le Kolisi o Maluafou o lea ua maua le avanoa e aoga faaauau ai i Amerika ma taumafai ai i le taaloga lakapi faa-Amerika, ma o se avanoa na maua e lea alii i le uluai tausaga o lenei polokalame a Paul Soli‘ai ma alo o Samoa ia na malaga mai i Samoa mo a latou polokalame faalauiloa.
Faaalia e Peter Gangser ua toe vaavaai le malo o Amerika i nisi fesoasoani e ese mai i atinae ua aumai i ai lana lagolago e fesoasoani ai i atumotu o le Pasefika, ma o se tasi lenei o fesoasoani o loo tele ina ofo atu e lea atunuu, lea la ua faasafua mai ai avanoa i Iunivesite eseese o Amerika auā le faalautele o soo se mataupu ma se tomai mo fanau o loo i vasega faaiu o Kolisi atoa ai ma Aoga Maualuluga i totonu o Samoa e agai ai i Amerika mo aoaoga faa-Iunivesite.
