I le mae’a ai o taaloga lona 16 a le Pasefika e pei ona sa talimalo ai le atunuu ua faatulaga mai ai o le ausiisii uamea mamafa, ua pine silia mai i autaaalo uma a Samoa na tausinio. E na o le pau foi lenei o le taaloga na tauva ai ma isi atunuu e i fafo atu o le li’o o atunuu o le Pasefika e pei o Uelese, Initia, Kanata ma isi, ona e tolu isi taamilosaga eseese na faagasolo faatasi ai ma taaloga a le Pasefika i le taimi e tasi, e aofia ai ma taaloga a le Oceania, o taaloga o Malo a le Taupulega (Commonwealth Games) ma taaloga e sailia ai ni avanoa mo taaloga a le Olimipeka o loma nei (Olympic Qualifying).

O le miti lava a le alii faiaoga ia Tuaopepe Jerry Wallwork mo taaloga nei a le Pasefika ina ia maua ai ni pine auro se 20 mo le au siisii a Samoa, peitai e lei taunuu lea miti ona e na’o le 16 pine auro na maua. Ae na ta’ua e Wallwork, e iai lava le popole i nisi o alo ma fanau pe a oo i le taimi e sii ai i luma o lona atunuu, ma e manatu o le tulaga lena na faaletonu ai le sii a nisi o le fanau.

O sui e toalua a Samoa na sii i le aso mulimuli e aofia ai Lauititi Lui ma Petunu Opeloge sa tatau ona atoa ai ni pine auro e 22 mo Samoa peitai e lei manuia a laua taumafaiga. O Opeloge ma Lui o le faatoa toe tauva ai lea talu mai manuaga na aafia talu ai, ma o se tasi lenei o itu na faapopoleina ai i laua nei, saunoaga lea a Wallwork.

Ta’ua e Wallwork, ua faamalieina o ia o le faiaoga i taumafaiga a le fanau siisii e tusa ai ma pine na o latou ausia mai i taaloga a le Pasefika. E pei ona silafia o le aofaiga atoa lava o pine na maua mai e le au siisii uamea mamafa mai i taamilosaga eseese nei e 84.

Gold (Pine Auro)

Pacific Games 16

Oceania 16

Commonwealth 12

Total Gold 44

Silver (Pine Siliva)

Pacific Games 6

Oceania 5

Commonwealth 7

Total Silver 18

Bronze (Pine Apamemea)

Pacific Games 11

Oceania 3

Commonwealth 5

Total Bronze 19

O taaloga foi nei a le Pasefika na malaga mamao mai ai le Peresetene o le Siisii Uamea Mamafa a le lalolagi le susuga ia Mr Tamas Ajan mai Hungary e na te molimauina le talimalo ai o Samoa i le taaloga lava lenei o le siisii uamea mamafa. Na faailoa mai foi e Wallwork e toalima lava sui o le ausiisii a Samoa ua tau vavala mai o latou avanoa e tausinio ai i taaloga a le Olimipeka i Tokyo Iapani i le tausaga e 2020, peitai e iai nisi o taamilosaga e tatau ona auai ai le toalima lenei ina ia faamautu atili ai o latou avanoa. 

E tasi le isi miti o loo momoo i ai le alii faiaoga ia Wallwork, o le faamatuu atu lea e le Malo o se faletaalo e faapitoa lava mo toleniga a le ausiisii, ona o le fale o loo faagasolo ai toleniga i le taimi lenei, e laititi ma ua lē mafai ona ofi uma i ai le toatele o le fanau o fia taaalo ai i lea foi taaloga.

E na’o le tasi le vaiaso na malolo ai le ausiisii atoa i le mae’a ai o taaloga a le Pasefika, ma o le Aso Gafua nei na toe amata ai toleniga mo nisi o taaloga faavaomalo o loma ai nei. Na faafetaia e Wallwork le taumafaiga a le fanau, o le lagolago o latou aiga aemaise foi le tapuaiga a Samoa atoa ua a’e ai ma le manuia taumafaiga a le ausiisii uamea mamafa mai i taaloga lona 16 nei a le Pasefika e pei ona sa talimalo ai Samoa.

I le faaiuga o taaloga a le Pasefika na matuā viia ai e le taitai o le Atunuu, le Afioga i le Alii Palemia ia Tuilaepa Sailele Malielegaoi, le faiaoga o le ausiisii uamea mamafa a Samoa, le Afioga Tuaopepe Jerry Wallwork ona o lona sogasogā i le taumafaiga o lenei taaloga.