Aunese Cureen o loo fusimau e lona afafine ma loimata maligi

O le tagi a le afafine o Aunese Cureen ina ua le tau lau o le faamoemoe o lona tamā, na taufai maligi ai ma loimata o le toatele i lea taimi, oi latou na oo i ai le lagona alofa i le taumafaiga a lea foi alo o le atunuu. Na faamatala Aunese, i le tusitala o ia na lavea lona vae ia Iuni 2019, aafia ai le maso o lona vae taumatau lea ua toe fati i le taimi o taaloga i Samoa. 

O lana tamoega lea o loo molimauina ai i le ata, peitai sa lei faafiti ma ia folafola, lona alofa tele i le tapuaiga a Samoa, e ui o le tulaga ua oo i ai lona vae i lea taimi, ae e lē malolo o le a toe taumafai mai e tamoe i le 5000mita i le aso e sosoo ai.  Na seti lelei lava le taamoe a Aunese i le amataga, ma iloa mamao atu lava e le au maimoa lana mua mamao mai luma, peitai o lana tala, na faaletonu lava i le toe 200 selau mita mulimuli o le tuuga ina ua se’i lona vae lea e iai le aafiaga o le manu’a i totonu. 

Maitauina le lotoa tele o le alii i le taimi o le tuuga, aemaise lava ina ua uma ane le tausinoga e lei manuia. Ma ua atili ai ona faaopoopo lona manaoga, ia saga taumafai atili pea e faataunuu le mafuaaga na malaga mai ai i Samoa. 

I lana tala, e lē o taumafai e ‘alo i se ataata, i lona faapea mai sa afaina lona vae ia Iuni. E lē faapea foi o le matua o lona soifua poo le fai o lona aiga ma lana fanau e toatolu ua afua ai le faaletonu o lana tamoe. 

E leai, o ia na sau lava e manumalo mo Samoa, e mamafa tele foi ia te ia le tapuaiga a le atunuu, ae o le taumafai lava ia faamalieina le maimoa tapuai atu. Ae ua lē tusa ai lava. E ui sa fautuaina lava ia e lona faiaoga ma le toatele o lona aiga, e aua ne’i tamo’e i le tuuga lea peitai o lona loto lava. 

Na molimauina foi le lagolago malosi a le tamaitai sa pule i le Kolisi o Avele a’o aoga ai Aunese, le Susuga Aiga Esera. O lana lagolago sa pei lava o le faatina o le alii i le malae, ma autafa mai o le malae, i lana fautua ma lana faamalosiau. O le isi lea tagata na molimauina foi le maligi o ona loimata i le mitamita ma le alofa i le maoa’e o le taumafaiga na oo i ai le tamo’e a Aunese e ui e lei manuia.

O le manaoga o le taunuu, na talanoa ai Aunese sa fautuaina lava ia e le falemai, e tatau ona malolo mo le ‘afa tausaga, peitai sa lē mafai lava lona naunau ma lona manatu maualuga e manumalo. “Na ou alu lava i totonu o le malae e leai ma se mea e tiga o lo’u vae, na ou sau sauni lava.”  

Na talanoa foi le tausoga o Aunese i Samoa, o le latou aiga atoa lava, sa faamautinoa lava e o uma i le Apia Paka e tapuaia le tamo’e a le alii. E oo lava i fanau laiti a le matou aiga, na la’u uma i le paka, auā o se tasi foi lea aoga sili mo latou, o le finau, mo mea silisili. 

Na finau mai lava Aunese i lana tuuga muamua, faasolo ane i le 1,500 mita sa masani ona mua ai, ma toe finau mai i le 5000 mita, ua leai lava.  Ae sa lē faavaivai ai foi le la’u ane o a latou tamaiti ma fanau i le malae e tapua’i. O se aoaoga sili lena mo fanau a le matou aiga, o le finau ma le loto i ai. E lē o mafai ona galo talafaasolopito o Aunese i le taimi foi na a’e mai ai lana tamoe, i taaloga laiti a le Pasefika, i Palau

* 2005, na mua ai i le 1,500 mita, ma le 800 mita i taaloga laiti i Palau

* 2006 na mua ai i tamoega a le Oceania Championship i Samoa, i le 1,500mita male 800 mita

* 2007 i taaloga a le Pasefika i Samoa, na mua ai foi i le 1,500mita ma le 800 mita ma le 5,000mita

* 2008 i le Oceania Championshop i Northern Mariana, na mua ai foi i le 1,500mita ma le 6k faataamilo i le atunuu. 

* Ua faamauina le suafa o Aunese, o le Samoa na ia ausia le tulaga siamupini i totonu o Niusila i le tuuga o le 800 mita, i le tausaga 2007-2008. 

Na talanoa ai le tina ia Eseta Tulimalefasi, o Faleata, “ua tele se sao o Aunese i le siitia lea o le tulaga o Samoa, i lea taaloga o le tamo’e, ae o se lu’i i le tele o fanau, i lenei foi tausaga i le finau malosi. O le tagi aueuē a si ona afafine ma fusi mau lona tamā, o se faailoga o aafiaga o fanau i lagona o le agaga taaalo o le Samoa, ma fetagisi atu ai lava ma le toatele na lolofi atu e fia faamalosiau ia Aunese.