O le masii uma mai o le toalua ia Leaogamalie ma Leinailaunaoo, ia poo afioga foi i matua ia Ale ma Ulu, ona o se faamoemoe saili seleni sa faia i Aukilani i le faaiuga o le vaiaso.
O se faailoga o le galulue faatasi ma le tutufaatasi e opogi le faamoemoe o le afioga ia Ale Vena, auā le faiga palota tele a le atunuu i Samoa i le masina fou.
O le faamoemoe o i laua matua, faapea foi le afioaga i Toamua, e lē gata i se sailiga seleni e fesoasoani atili ai ma lagolago ai le faamoemoe o le afioga i le Faipule, peitai o se fesoasoani foi mo le isi fuafuaga a le afioaga mo le tatalaina o auala galue fou e pei ona ua mae‘a ona faia i totonu lava o Toamua.
O le fausia o auala galue ua fai ma fiafiaga o le nuu, ma o se galuega tele sa nafa ma feagai ma le malo ma le afioaga, ma o se tasi o vaega tāua e faamanatu ai le uluai tulai mai o Ale Vena i le nofoa o le itumalo mo sina vaitaimi.
O se tasi o faailoga e faamaonia ai le finau ma le galue malosi o le alii faipule i nai taimi sa tulai mai, ina ua mae‘a le toe faia o se faiga palota laititi a le itumalo.
O le sailiga seleni na faia na faamaonia mai foi e le taitaifono o le mafutaga a Toamua i Aukilani, Pagamalie Iopu Faivalu e faapea e silia ma le $10,000 na maua.
E toaono le aumalaga na malaga mai, e aofia ai le afioga i le alii faipule Ale Vena ma lona faletua, le afioga ia Ulu ma isi matai o le afioaga.
E lei faia ni valaaulia, ae na o i latou lava sa auai i le faamoemoe i le Aso Toonai na tea nei, sa lafoina ma fesoasoani i le faamoemoe.
E pei ona ta‘ua muamua, o le seleni o le a lē gata ina fesoasoani i le faiga palota, ae o le a fesoasoani foi i le tatalaina o auala galue o le afioaga, ma o le a faataunuuina a o lumanai ai le faiga palota ia Mati 2011.
O se tasi o vaega tāua tele o le masii mai o le faigamalaga, ona sa faapea foi ona foai ai ma ni meaalofa tāua tele mo le taitaifono ma le mafutaga a le afioaga i Aukilani.
O le Tootoo, o le Fue, ma le Tanoa, sa taliaina e le taitaifono Pagamalie Iopu Faivalu, faapea ma le sui taitaifono Moanatuli Sapolu Ale.
O Ale ma Ulu o Tapaau o le nuu i Toamua, ma o le meaalofa sa tauaaoina ma foaiina, o se fiafiaga tele mo le mafutaga, ona o le ata manino lea o le foai mai o le lauga auā le tausia o le nuu, itumalo ma le atunuu i Samoa ma Niu Sila.
Saunoa Pagamalie Iopu Faivalu i se feiloaiga ma le Samoa Times e faapea, e lagona le agaga faafetai tele ma le faamaualalo o le loto i tamā o le nuu ona o le amanaia ma le faaalia o le faaaloalo i le nonofo ai ma nopiai i Niu Sila.
O se faaaloalo maualuga, ma e lē alo tamala foi i ai le taliaina ma le faaaogāina, a o iai i atunuu ese.
Saunoa Pagamalie, o le lauga e le faigofie ona faamatuu mai, peitai o agaga o tamā ma Tapaau o le nuu ia Ale ma Ulu, ia faaaogā mealofa a le Atua ia laua matai sa fai ma tautuaina le nuu.
O se taimi o le vaiaso nei ua fuafua e toe taliu ai le faigamalaga i Samoa e sauni ai mo fuafuaga tetele e pei ona faailoa ma auala mai ai le malaga saili fesoasoani seleni i alo ma fanau a le afioaga i Niu Sila.
Avea foi lenei avanoa e momoli atu ai ma faamanuiaga a le Samoa Times, auā le alo atu o le afioga ia Ale Vena mo le sailiga malo, auā upufai o le malo ma le Palemene a Samoa, e ala i lana faiga palota tele i le masina fou.
