Misa fafine Samoa ma le palagi i le faleoloa ave fua

O le fautuaga: Ave tau o taumafa o loo moomia ae lē o le luluu ma soona afisi, e tupu ai le salalautasi ma masaa solo i luma o le faleoloa, ae lei oo i le taavale


E lei faatamala le mamalu o Samoa i Aukilani i le talisapaia ma le faaaogāina o le avanoa e agai ane ai ma ave le tele o oloa ma taumafa, ina ua tatala le faleoloa ave fua (free store) i le pitonuu i Henderson i Aukilani Sisifo.

E ta le fitu i le taeao ua leva ona taunuu i ai, ma amata faatulaga ai se laina umi o tagata sa fia maua lea foi faamanuiaga e ala i le ave fua o oloa ma taumafa e lē totogia.

O le sefulu i le taeao o le Aso Gafua, aso 14 o le masina nei lava, sa faatulagaina e tatala ai lea faleoloa, peitai ina ua feiloai atu i nisi o le mamalu o le atunuu i lea taeao, sa latou faailoa ai na usupo lava ma taunuu i le nofoaga pe tusa o le fitu i le taeao lava lea.

E taunuu le sui o le Samoa Times ua tea le iva i le taeao, a o le taimi tonu lea ua tusa ma le luaselau mita le umi o le laina, i lumafale tonu o le faleoloa.

E lē gata i le umī o le laina o i latou sa faatalia le taimi e tatala ai, peitai sa toatele foi nisi sa tutū solo ma tau sema atu se taimi e maua ai se avanoa i le laina.

O le umi na faatali o le mamalu o tagata lautele mo le tatalaina o le faleoloa, na amata ai ona aliae ma se vevesi, ma tauga upu a ni tina Samoa ma se tina palagi.

Na amata lemu fetauiga i upu, ae na faasolosolo a‘e lava ina matuā faatū ai ma le lui a le tina Samoa agai i le tina palagi.

Na mafua le vevesi ona na taunuu ane nisi faatasi ai ma tina Samoa ma toe amata ane le isi laina fou agai i le faitotoa o le faleoloa. E lei toe mau le ‘afa a le tina palagi, ae osofai loa ma le isi vaega lea sa faia lea tulaga.

O le lē fiafia ma le ita tele o le tina palagi ona ua fai si leva o tutū ma onosai, ma faatali i le laina ae fai le osofaiga a le isi vaega, iu ane ai ua pito i luma, ma latalata tele i le faitotoa.

Na umi se taimi o fetaui pea i upu ma tala, ma e ui ina e lei pa‘i lima itu e lua, ae sa lagona le faanoanoa ona ua avea le taufao o le laina, ma auala ua galo ai le aga masani a Samoa o le faaaloalo ma le va fealoaloai ma isi.

E lei leva ona mae‘a le vevesi lea, ae taunuu loa ma leoleo ma amata ona faatonutonu le saogalemu, ma vaaia le faatulagaina lelei o le laina. E lei mamao ae sau loa le alaga, e malilie ua mae‘a taumafa ma oloa, ae toe sauni mo le aso lona lua.

Na taliu ma le lē fiafia le toatele, ona ua fai si leva ona tutū ma faatali i le laina, ae maua ane ma le faamatalaga faatiga ulu, ma ta‘ape ai loa ae lei tāina le sefululua i le aoauli.

E tele ni faitioga ma ni faaseā a nisi sa maua e le Samoa Times i lana lava ia suesuega ma fesili sa fesiligia ai tagata sa auai ane i lea aso.

O faaseā sa agai i taumafa, o nisi na sasalu atu o le a iai ni fasipovi, ni fasimamoe, ma le tele o taumafa tuuapa.

O nisi sa faaalia le lē fiafia ona ua lē tusa ai le umi na faatali ma taumafa na maua. A o le taualuga o finagalo lē faamalieina, ona ua vave uma oloa, ae lei oo uma tagata i totonu o le faleoloa.

O se tasi o itu na fai si ofo ai le sui o le Samoa Times, ona o le isi tina na ulufafo mai le faleoloa ma le luuga ma le afisiga o taumafa, ae sa lē faamalieina lava lona finagalo.

O le saunoaga a lea tina ina ua fesiligia ae faapea mai, E! maimau le taimi!

Sa faamanatu i nisi, pe lē tatau ona faafetai ona o le avanoa ua tatala mai, ua maua fua ai nai ia taumafa mo lea aso, ona e seāseā foi maua ni avanoa faapea.

O Niu Sila, e faatau lava i tupe mea uma, a o lea ua selesele ma tufi taufao nai ia faamanuiaga e lē totogia, leai se tupe e alu ai.

E moni ma faamaoni, o le toatele o tagata sa malaga mamao atu lava i Aukilani Tutotonu ma Aukilani i Saute. Matagofie le faalogoina o le manatu o si tasi tina ma si ana fanau na agai atu mai Magele.

Ina ua fesiligia, ae sa faaaloalo ma talia fiafia e lenei tina lea taumafaiga.

Sa ataata lava lea tina ma faapea mai, ia o le fia molimauina lava ma le fia tafafao foi na mafua ai ona malaga atu.

O taumafa foi sa latou maua, e matuā talia ma le agaga faafetai.

E tuua e le Samoa Times lea nofoaga, ae ua amata ona to‘agaogao, ona ua mae‘a ona faalauiloa ane le tulaga utiuti ma ua leai ni taumafa mo lea aso.

E tele foi ni taimi sa fefaasoaai ai le Samoa Times, ma le pulega sa faatautaia le faleoloa, ae faapea foi le polokalame a le Campbell Live sa auai ane i lea aso.

O nisi o vaega e aofia ai nisi o metotia ma faiga e faaitiitia ai le soona ave e le tagata e toatasi o taumafa, ae ao ina fuafua lelei.

E lē gata i lea, ae pe faapefea foi ona mataituina le ave o taumafa tuu i le taavale, ae toe foi mai ma toe tutū i le laina.

O le taumafaiga lava ina ia tutusa tagata uma, ma ia maua faatasi le avanoa e oo ai i totonu o le faleoloa.

Na ta‘ua e le pulega o le faleoloa i lea lava aso, o le a fai se suiga mo taimi mulimuli ma le faagasologa i le lumanai. O le aso na sosoo ai, Aso Lua sa amata ai ona faatino se tasi o suiga e ala lea i le faatulagaina o le aofai o oloa e ave a le tagata e toatasi, ona sa toe telē foi le isi laina.

O le mau a le pulega o le faleoloa e faapea, Ia ave na o mea o loo manaomia, ae lē o le soona ave.

O se lapataiga foi lea mo le mamalu o le atunuu o le a agai ane ma faaaogā le faleoloa, ina manatua, e ave tau o taumafa o loo moomia ae lē o le taumafai e luluu ma soona afisi, e tupu ai le salalautasi ma masaa solo i luma o le faleoloa, ae lei oo i le taavale, e pei ona vaaia i lea aso a o tumutumu tagata.