Sa tulituliloa pea e le Samoa Times ina ia maua tonu le ‘au o le paipa, ma manino lelei le mata o le vai, i faiga soonafai ma le taufaavalea ua alu ai ma leiloloa ai le anoano o ta‘i afe tala a nisi o aiga, mo le taumafaiga o talosaga ma pepa nofomau a nai o latou aiga na malaga mai Samoa.
O Lisa Brown poo Lisa Faalogo, o Elise Tiatia, o Annastasia, faatasi ai ma Misiona Mamea, sa uluai lomia i nisi o lipoti muamua, o latou ia sa faia lea tulaga faalēalofa, ma ua mafatia ai nisi o aiga Samoa lava. O le ave o tupe, a o le isi faaletonu tele, o le ave ma tusifolau, ae leai ma se galuega sa faia i talosaga, ae ua na o pepelo sa fafa i luga o isi foi mau pepelo sa faasese ma faasee ai tagata.
O le mae‘a ona lomia o ia lipoti a le Samoa Times, ua faamalosia ai ma aiāina ai le loto mafatia o le tamaitai o Misiona Mamea, ma ua manatu ai e fia fesoasoani mai i le mataupu. O le fesoasoani na ofoina mai e Misiona, o lona taumafai lea e tautino ma faailoa lona manatu e uiga i le kegi o loo sailia pea.
Na tautino Misiona, na faitau i lipoti a le nusipepa ma na matuā aafia tele ai ona lagona, ona talu ai o le tāua o lona igoa ma ua foliga ua faatietie le mamafa ia te ia. O le avega ua toe faaopoopo atu, ae o loo matuā mafatia tele, ona o faiga a le latou vaega e pei ona ta‘ua, sa muai fai ia te ia.
E silia ma le $10,000 lana foi seleni sa alu ma faaaogā e le vaega lava lea, ae leai ma se talosaga sa faia i lana fanau sa malaga mai Amerika Samoa, o le tala manino mai lea a Misiona. Sa ia tautino e faapea, o le mafuaaga foi lea na fetaui ai mo le taimi muamua lava ma le kegi ma igoa e pei ona ta‘ua muamua.
Sa ia ta‘ua foi e mautinoa lava, o tupe uma a tagata ma aiga e pei ona faailoa i le nusipepa, na matuā teena ma e leai ma se sene apa sa ia faaaogāina. E moni sa ia tapa tupe a tagata ma aiga, peitai o lana lea galuega sa fai ma lona talitonuga, e leai se faletonu o le galuega a i latou ia.
Ae pagā lea, mulimuli ane ua salamō, a ua leai se mea e toe mafai ua sosola ma tupe, ae lei toe fesootai ane ia te ia. Na ia ta‘ua foi lona mafatia tele, ona sa tau lē fafagaina lona aiga, sa oo lava ina lē totogia fale mautotogi sa nonofo ai, ona o le naunau e totogi muamua pili a le vaega fai nofomau.
Peitai, na matuā vavamamao lona manatu sa iai, ma le mea na tulai mai, ma e faamaonia lava lea faamatalaga, ona o lana fanau sa aafia ai talosaga, e lē o mafai ona aooga i le taimi nei, ona o le faafitauli, o le lei nofomau i Niu Sila.
Na tautino foi Misiona ma faamaonia igoa ma galuega a tagata e pei ona faailoaina. Na te lagolagoina foi, ma ia molimauina foliga ma faiga a ia tagata, peitai o le mea sili ona faigata, ua lē toe vaai i ai, se‘i vaganā ai nisi o molimau sa faailoa ane ia te ia, tuatusi ma igoa o le vaega.
Na faailoa e Misiona, sa oo lava ma asia se tasi o fale sa ta‘u ane e nisi o ana uo, peitai o le fale i Manurewa, ua vaoa ma ua foliga ua leva e lei nofoia e ni tagata ola. O loo faaauaau pea lava foi ana sailiga pe toe maua nisi o faamatalaga e uiga ia Lisa, Elise ma Annastasia.
Sa fesiligia foi Misiona, poo ai tonu e ona le tusitupe lea sa faaaogāina e tiposi i ai e aiga le tele o seleni. Peitai na te lei mautinoa, ae na pau le tulaga sa ia faailoaina mai e faapea, o se isi lava o Lisa poo Annastasia. O le toalua lava lea na te mautinoaina o se isi o laua e ona le tusitupe lea.
Ua faamaonia foi e Misiona, e pepelo uma faiga ma gaioiga a le vaega sa latou galulue faatasi. O le isi lea gaioiga sa faia e ia tagata, o le taumafai lea e faaaogā igoa o nisi i totonu o le ofisa o Femalagaiga, ina ia tuua‘i i ai faiga lē sa‘o ma le aitupe sa latou faia.
E iai nisi o faamatalaga sa tuuina mai e Misiona, e tai foliga tutusa ma e tau ogatasi ma molimau a nisi sa maua e le Samoa Times, ia ana foi sailiiliga. O ia faamatalaga uma, o loo faamaumauina pea, ma tuufaatasia ma pasi agai i le ofisa o leoleo, ina ia vave ona maua ma faia se faamasinoga faasaga ia i latou uma.
O loo matala pea lava foi le avanoa, mo soo se tasi lava e manatu sa vaai talu ai nei i se isi o i latou ia, ina ia fesootai mai ma fesoasoani atili i le ma‘i pipisi, o le manao tupe i auala piopio ma le taufaavalea.
Ae o le fautuaga mo le mamalu o le atunuu o loo manaomia lea ituaiga auaunaga, e manaia le fesootai pea lava ia i latou ua mae‘a ona lesitalaina faaletulafono i lalo o le Matagaluega o Femalagaiga a Niu Sila, poo le Ofisa foi o Femalagaiga mo fautuaga talafeagai ma le tonu.
E na o le toatolu tamālii Samoa i totonu o Niu Sila atoa, ua faamaonia ma lesitalaina ma ua faatagaina foi e le Matagaluega o Femalagaiga a Niu Sila, latou te faia galuega faapea, ina ia tusa ma faiga ma gaioiga o loo faia foi i totonu o le Ofisa.
O le afioga ia Tuiafelolo Taavao Vole, ma lana auaunaga Telestial Finance & Consultant i Magele. O le susuga ia Uaite Letalu i Otahuhu, faapea ai ma se tasi o tamaitai Samoa, peitai e lē o mautinoa poo iai sona ofisa i le taimi nei, ona pau na o i latou o loo faagaioi ai se auaunaga faapea.
O le tulaga o faifeau a ekalesia, o loo iai pea foi le avanoa ma le faatuatuaina, peitai e lē tatau lava ona taliaina pe faia se pili ma se totogi o lana auaunaga, ona talu ai e lē o faatagaina i lalo o le tulafono ma faaiuga a le Matagaluega. E faatino uma ana galuega i le tulaga o le fesoasoani, ae lē totogia.
Ae ina ia tuumāmāina mai foi le mafatiaga o loo tele ina mafatia ai le mamalu o le atunuu i nei lava faiga piopio, o le fautuaga sili lava e pei foi ona ioeina e le tamaitai o Misiona, afai ua lē agai i auaunaga a nisi o tamalii Samoa e pei ona ta‘ua i luga, e leai se faigata o lou maliu sa‘o lava i le ofisa o femalagaiga o loo iai i lou vaipanoa. E leai se tulaga e atugalu ai i le gagana, auā ua iai uma lava auaunaga tau gagana i le tele o matagaluega a le malo, aemaise lava i matagaluega e pei o femalagaiga, auā e mautinoa le asia soo e tagata mai soo se gagana.
Ua manatu e toe faailoa pea lea tulaga, ina ia manino ma malamalama i ai le mamalu o tagata lautele, ona talu ai e lei mamao tele foi ona lomia atu e le Samoa Times, se tasi o auauna faifeau, ua tele ma anoanoai seleni a nisi o lana aulotu ma isi, sa faaaluina ma totogi ai, ae leai se galuega e faia.
