E pei ona lipotia ai i le tatou lomiga i le vaiaso talu ai, le tauaofia ai o le fonotaga a le Ekalesia Metotisi Fou a le Atua a lana komiti tumau, e pei ona amatalia ai i le afiafi o le Aso Faraile, aso 22 o Fepuari 2019 lea na faataunuuina i Sini Ausetalia nei, ae faaiuina ma tapuni aloaia ai i le afiafi o le Aso Sa, aso 24 o Fepuari 2019.
I se faatalanoaga ma le susuga i le toeaina o le Sinoti a Ausetalia le susuga ia Rev Dr Vili Iosua na fesiligia ai i le auga ma le autu o lenei fonotaga faaletausaga a le Ekalesia.
Na saunoa le susuga i le toeaina ma ia faamalamalamaina ai e faapea, “O le fonotaga masani lava lenei a le Ekalesia i tausaga taitasi i lana komiti tumau o loo aofia ai le susuga i le Taitaifono Aoao o le Ekalesia, le Failautusi Aoao aemaise o susuga i faafeagaiga Misionare ma Failauga. O le agaga maualuga ina ia toe silasila ma lauliliuina ai lea o nisi o vaega tāua auā le agaigai i luma o le feau ma le galuega a le Ekalesia i ona itutino uma aemaise lava i le itu faaleagaga.”
O le faatinoina ai o lea fonotaga i Ausetalia nei, ona o se valaau faaaloalo a le susuga i le toeaina ma le Sinoti a Ausetalia i Campbelltown ina ia faia ai lea fonotaga i Ausetalia mo le uluai taimi, e pei foi ona tauaofiaina ai i Samoa ma Niu Sila i tausaga ua mavae pei foi ona tauaofia ai i Niu Sila i le tausaga talu ai.
O le susuga lava i le Taitaifono Aoao o le Ekalesia ia Rev Petaia Setu na ia tatalaina aloaia le Fonotaga ma faapea foi ona ia toe saunoa e tapuni aloaiaina e pei o aga masani o fonotaga faapenei.
O le usugafono a Niu Sila na fai ma sui o le fonotaga e faaleoina le agaga faafetai ma le faamalo o le susuga i le Taitaifono Aoao, le vasega o toeaiina Misionare ma Failauga, e faafetaia ai le susuga i le toeaina o le Sinoti a Ausetalia Rev Dr Vili Iosua ma le faletua ia Folose, susuga i Misionare ma o latou faletua, tupu ma e’e ma faletua, o le Ekalesia Campbelltown ona o le agalelei ma le aga faitaulaga i le tausiga ma le vaaiga o le Fonotaga a le komiti tumau. I lea agaga faitaulaga na tauaaoina ai e le toeaina ma le ekalesia nai teutusi e fai meaalofa ai i le faimalaga mamao mai o sui taitasi o le fonotaga. O le afiafi lava o le Aso Sa na toe tuuvaa atu nai nisi mo atunuu o loo alaala ma papaaao ai, faapea foi nisi i le ogatotonu o le vaiaso, se’i vagana ai le susuga i le taitaifono ma nisi o le Aufaigaluega a le Atua, o loo iai pea i Ausetalia ona o feiloaiga ma nisi o ekalesia o loo ua faatau mai lo latou fia galulue ai i lalo o le faamalu o le Ekaleisa Fou a le Atua.
E lei mafai ona faailoa mai poo fea o le a usuia ai le isi fonotaga a Komiti Tumau a le Ekalesia mo le tausaga fou.
