Vasega sa faatinoina polokalame a le Culture DORR- “O A’u ole Samoa” Lilo i manatu o Mātua se naunauta’iga tele o alo ma fanau pe ana lē auai i le polokalame a le Culture DORR

E iai le talitonuga o le Atua ua ia faataunuuina mea uma, o le Atua foi e faigofie ai mea uma. O le masina o Iulai i le 2018 na uluai amataina ai le vasega o le Culture DORR, o le sitepu muamua i le a’oa’oina o le gagana Samoa, e faapitoa mo alo ma fanau na soifua a’e i atunuu i fafo. O le atoaga o lenei vasega, o le galulue faatasi lea o tamaiti, faiaoga faapea mātua amata mai totonu o aiga, o le vave foi lea ona maua se fesoasoani i nai alo ma fanau. O le taeao o le Aso Toonai aso 26 o Ianuari na potopoto ai lenei vasega i Springfield, ma a’oa’oina ai le faiga o le suavai poo le umu.

Na molimauina e faiaoga, mātua faapea le tamaitai o Regina Taua na ia uluai fofoaina mai lenei a’oga, se suiga o nei tamaiti i le sagisagi fiafia e tapena ma faatino le suavai (umu). Na lilo i manatu o mātua e faatupulaia ma faaosofia ni lagona faapenei o fanau e a’oa’oina nei tu ma aga faa-Samoa, pe ana lē auai ma faatasi atu i lenei polokalame a le Culture DORR. O se molimau lea a le tamaitai o Regina Taua i se faatalanoaga. 

O le aoauli o le Aso Toonai lava lea na feagai ai ma le Fiafia Night ma faatino ai nisi o lauga faigofie e pei ona masani ai. O le Aso Sa 27 o Ianuari sa see atu ai le vasega i Gold Coast mo nisi polokalame E amata atu i le Aso Sa seia paia le Aso Toonai (6 aso). O le tausaga lenei ua atoa le 120 o tamaiti i le a’oga i le polokalame lava lea ua igoa foi “O A’U O LE SAMOA” i lalo o le faamalumaluga a faiaoga le susuga ia Lufilufi Alaelua Leasoiloaifaleupolu Taulapapa Malaesala Malaesala ma le tofa ia Tuuu Apulu Uta’ileuo Kalala Tanuvasa Tofaeono.

O le tomai ma le naunautaiga o loo faasoa mai e faiaoga, e saga faatupuina ai lagona fiafia o tamaiti e auai, ma o se suiga tele lea i o latou olaga. 

E lele le toloa ae ma’au i le vai, poo fea lava e iai le Samoa, e aapa lava i lana agaifanua ma lana aganuu faa-Samoa e tiu ma mitamita ai i le vasaloloa. Ua amataina nei ona toe faagasolo vasega faapitoa o le Level 1 & 2 o le Polokalame ua igoa ‘O A’u O Le Samoa” O loo iai pea avanoa pe a fesootai atu ia Regina Taua.