O sui na auai i le fono a auaunaga taufemalaga’iga a atunuu o le Pasefika sa usuia i le faletalimalo o le Tanoa Tusitala i Sogi

O le fono a le ofisa o le Pasefika o loo i Samoa o loo gafa ma mataupu tau femalagaa’iga sa usuia i Samoa i le vaiaso ua mavae sa lipoi ma faasoa ai manatu o sui o atunuu eseese ini auala e malu lelei ai le leoina o tuaoi o atunuu ina ia taofia ai faigasolitulafono i le feaveai o tagata ma le feaveai o aupega aemaise o laau, o pauta ma fualaau faasāina. 

O le fonotaga lea na fesiligia ai le Ofisa sili o le Matagaluega a le Palemia ma le Kapeneta le susuga Agafili Shem Leo i le laumanuia o le igoa o Samoa ise mataupu o loo molia ai se tama o se tagatanuu o Samoa e alala i Niu Sila, i le solitulafono o le feaveai o tagata ini auala solitulafono poo le human trafficking.

“Ua uma ona matou feiloai ma leoleo mai Niu Sila sa o mai ise vaega o a latou suesuega, ma ua ou faailoa iai e leai se aafiaga o Samoa i lena mataupu”. 

“O tagata lava ia sa malaga i Niu Sila i auala ma faiga masani e tusa o aiaiga o le tulafono o femalagaa’iga, ae leiloa la e tatou mea o tutupu i Niu Sila iai latou sa taunuu iai tagata na”.  O le finagalo lea o Agafili ma ia faailoa ai e lē o faatamala le ofisa o femalagaa’iga i le itu i le vaavaai lelei o faiga solitulafono e sosofa ai le saogalemu ma le malu puipuia o tuaoi o Samoa ma isi atunuu o le lio o le Pasefika.

I le talanoaina o mataupu tau femalagaa’iga i le va o atunuu o le Pasefika na faailoa e le Ofisa sili o le Matagaluega a le Palemia ma le Kapeneta i le tatalaina o le fono, e taua tele le galulue faatasi o auaunaga tau femalagaa’iga a le Pasefika, i soo se manaoga e mafai ai ona fetufaa’i faamatalaga, ina ia mafai ona iloa ma silafia uma e ia auaunaga ni gaioiga e masalomia ai le sao mai i atunuu o fualaau ma pauta faasāina, o le feaveaiina o tagata ini faiga eleelea, faapea le sao mai i atunuu oni aupega malolosi.  O Samoa ua faatuina ai le ofisa autu o matauputau femalagaa’iga mo le Pasefika, ma o se auaunaga ua fesootai ai atunuu i taimi uma pe a oo ina faatino ni taumafaiga e taofia ai ni faiga solitulafonofaapea.