O ni tausaga e lei mamao atu i se tasi o paea’iga a le Palemene ao avea le tofa Unasa Mesi ma Minisita o le Matagauega o Faamasinoga, na teuteu ai le tulafono o fanua ma suafa ma aiaia ai le matua o le soifua o le tagata Samoa e mafai ai ona umia se suafa matai o aiga.
Na aiaia e faato’a 25 loa tausaga o le matua ona faato’a mafai lea ona faaee iai se matai, peitai i tausaga ua tuanai talu ona faamamalu lea aiaiga e toatele nisi sa faitioina ona e iai mafuaaga. O se tasi o mafuaaga o nisi aiga o le matutua o fanau ua 21 ae o matua o ia fanau ua oo ina pulapula la goto le soifua ae o loo fia faamatai fanau ina ne’ sau le valaau ae lei faamataiina o latou suli. O nisi aiga ua faamatai fanau ona ua leai lava nisi e fia matai ae o le faalavelave o tausaga e lei oo i le 25 ae ua maua le 21. O lea la ua toe aiaia i le tulafono fou o le a suia uma ai le tulafono o fanua ma suafa, a 21 loa tausaga o le tagata ua avanoa i lalo o le tulafono ona nofo i se suafa matai. O lona uiga e mautinoa o nisi saofai a aiga ma nuu o le a faatino i se taimi o lenei tausaga pe a saini aao le Ao o le Malo i lea tulafono, o le a oo le numera o tagata e matai i le selau ma ona tupu auā ua toatele le au 21 ua lesitala mo le palota tele o le 2021. E ui sa iai atugaluga o nisi o sui faipule o le Palemene i nisi o aiaiga fou o lea tulafono peitai o le a faatino malosiaga o le tulafono pe a oo ina amata faamamalu i se aso e finagalo ai le Minisita o Faamasinoga ma le faafoeina o mataupu tau faamasinoga le afioga Faaolesa Katopau Ainuu. O le filifiliga o faamasino ma le faatuina o faamasinoga o talosaga se lua o nisi ia o suiga tetele i le faatulai mai o lea tulafono fou e faatonutonu ma lima taitaiina ai galuega a le faamasinoga o fanua ma suafa a le atunuu.
Ua manino i aiaiga fou o lea lava tulafono o suiga tetele ua iai lenei vaitau o le soifuaga i Samoa ma mea ua tutupu ma aliali mai, ua lē toe ganea ai aiaiga o le tulafono o le a soloia. Ua foi le tulafono i lona tulaga faakomiti e avanoa ai le atunuu e faaali finagalo a’o lei toe foi ane i le Palemene mo le faia o ni teuteuga pe afai e iai, ma pasia ai loa i lona faitauga faatolu i e isi fonotaga a le Fono Aoao Faitulafono o lumanai ai nei.
