E lei atoa se masina talu ona uma ona tanu le tino maliu o le tinafai, ae toe fafagu e le toeaina ua savali i le 20 tausaga talu ona maliu (oti), le la ataliifai lea o loo nofo ma mavaega.  Manatua o se toe tuliloaina lenei o lea foi tala ua mae’a ona outou faitau i lona vaega muamua.

Lea na o ai le aiga i le motu e liu tofaga ane le tamā e teu i lona fanua i Apia, ae sa faate’ia, i le tata’e atu o le fanua maliu ae pupusa ane i luga le manogi, ma toe suia ai le tonu e taatia ai pea le toeaina i le motu. Ae o le manaoga o le toeaina e teu faatasi laua ma le tina i Apia, pe a oo atu i lena taimi ua talafeagai ai. O le ataliifai lea sa tele ina malamalama lelei i na tuugatala.   

O le mataupu lenei e pei ona lipotia muamua e le nusipepa lenei, ina ua lē usitaia e nisi o le fanau a le toeaina ua latalata i le 20 tausaga talu ona maliu lana mavaega na mavae ai i lona ataliifai, faatoa liu tofaga ane lava i Apia, pe afai e maliu lona toalua ma avatu e teu i le la fanua i Vaitele.

O le uso o le ataliifai, e ui ina faamanatu iai e le atalii fai le mavaega na tulai lava i le alofa faaatalii ma malaga i le motu ma taumafai e liu tofaga ane i Apia lo latou tamā peitai, e ui ina silia i le 15 tausaga talu ona maliu, ae pei lava faatoa maliu ananafi, i foliga na iai ina ua tata’e atu le fanua maliu ma toe tuu ai loa i le motu.

Talu ai nei ona uma ona teu le loomatua, ma o le faamatalaga a le atalii na toe lotea ai i le latou talanoaga a le latou aiga a’o lei taapeape, le mataupu lava lenei, le liu tofaga mai o le toeaina, i Apia, aemaise lea ua maliu le loomatua, ma ua tatau loa ona faataunuu le manaoga o le toeaina.

“Na fai lava le talanoaga ae ou nofonofo ma ou mafaufau, poo iai se isi vaega o le  mavaega a le toeaina (lo’u tamāfai) e tatau  ona faataunuu, aemaise e foliga mai o o’u uso ma o’u tuafāfine, ua see foi lo latou sa i le faataatiaga o a latou fuafuaga i le liu tofaga mai o le toeaina.”

“E leai lava se isi se’i faapea ane e fesiligia a’u i so’u manatu ona o a’u lea na māvae mai iai le toeaina. Ai ona e faapea o a’u o le tamafai.”

“Na ona ou nofonofo lava e leai ma sa’u faamatalaga, se’i vagana ai se tasi o uso na fai mai, vaai si tatou mea i tatou maoaluma atu, pei lava faatoa maliu le toeaina ananafi.” E maitau lelei e si uso lea, le tagata o le latou fanau na alu tonu iai le mavaega a le latou tamā, le toeaina o loo taatia ai nei lava i le motu.

Fai mai le faamatalaga a le ataliifai, e lei iai se isi na toe pisa ane ae na’o le saō, ua leai ma se isi e toe pisa ae faalogologo atu i sana faamatalaga. Ta’ua e le ataliifai, na ia faamatala i uso ma le aiga ua mae’a le vaega muamua o le mavaega, o le aumai o le tino maliu o le loomatua e teu i Apia, o le vaega lona lua o le fai loa o fuafuaga e liu tofaga mai loa i Apia le toeaina e pei ona manao ai.

Peitai na toe asiasi ane le oti i lona ataliifai i le po lava lea na fai ai le talanoaga. Fai mai le ataliifai, na ia vaaia foliga o lona tamā i lana miti. Na ia toe sosogiina foi le manogi o le fagu sausau a lona tamā lea e fiafia lava e faamanogi ai a’o ola.

O le tala a lona tamā ia te ia, e aua le popole i le liu tofaga e mulia’i ona faataunuu, ae vaai le aiga, ia toe tasi, ma ia fai se auala e toe tasi ai lo latou aiga, ma ia fealofani; a mae’a ona soalauple le vaega lea, ua toe tasi ona faatoa talanoa loa lea i le liu tofaga. Na ta’ua e le ataliifai na nofo i luga, ma mafaufau toto’a i lana miti, poo le ā le uiga, aemaise e oo mai lava i le taimi lenei o loo matuā kilia lelei i lona mafaufau lana miti.

Na fesiligia le ataliifai, i le isi ana fuafuaga e fai, lea na ia faaalia, o le a faasee e faatino le vaega lea na asia ai ia e lona tamā, ona o le taimi nei, o loo vaelua lo latou auuso, o loo feeseesea’i, ma o le a taumafai e fai se faiga e foia ai lea faafitauli, ona faatoa talanoa ai loa lea i le liu tofaga a lo latou tamā.

O le faaiuga o le tausaga lenei le maa o le loomatua, ma o le manatu o le ataliifai, o le a fai ai ma le liu tofaga o lona tamā.

O le a eli lelei se vaega e sosoo ma le tuugamau o le loomatua e tuu iai ponaivi o le toeaina ona e lē mafai ona tata’e le tuugamau o le loomatua ona e lei leva ona maliu, ae mo le puipuiga o le soifua maloloina o tagata uma. I le taimi nei lava ia, ua taoto ai pea le oti i le motu, ae se’i faatino muamua lana faatonuga, o le faaleleia o le lotoifale o lana fanau.