O le suiga ua iai le olaga ma le soifuaga e lē o se mea fou i lalo o le la, o polokalame ua leva ona faataoto mai i foafoaga a le Atua. O le manulauti lea poo le faatofalaiga a faioga o loo aoaoina fanau laiti i totonu o aoga faataitai e aofia ai le aoga amata St John Evangelist mai Otara, Mar Addai Pre School mai Papatoetoe ma St Peter Channel Samoan Bilingual i Clover Park e aoaoina fanau ina ia latou iloa le suiga ua iai le taamilosaga a le lalolagi ma mea ua tutupu ai. O le faamoemoe o faiaoga ia iloa e fanau laiti le suiga ua iai, e pei ona amata mai ai fefaatauaiga o oloa mai isi atunuu i isi atunuu. O le suiga o le tau ua iai nei le lalolagi, faatasi ai me le suiga o oloa.
O lenei polokalame sa faataunuuina lea i le Aso Lulu o le vaiaso ua mavae i le malae taaalo a le aoga a Sagato Petelo Aoga Amata. O se aso lagilelei ma le matagofie sa faataunuuina ai le faamoemoe mo le fanau e pei ona sa faapolokalameina i le va o aoga e 3. Sa galulue faatasi faiaoga o aoga e 3 i le faatautaiga o lenei faamoemoe faatasi ai ma le fesoasoani mai o pulega a aoga. O nei aoga uma o loo i lalo o le faamalu a le Auckland Catholic Preschool Trust. O tamaiti mai le 1 le tausaga le matutua sa auai seia oo atu i luga i le 4 tausaga, ma o tamaiti foi ia ua faatapena atu mo le ulufale atu i aoga tulaga lua.
O lenei faamoemoe o le faalauteleina o le malamalama o alo ma fanau i auala o fela’uaiga e pei ona faaaogaina ai ituaiga ta’avale eseese. E lē gata i lenā, ae o le a’oaoina o tamaiti ia latou iloa le suiga o le soifuaga ua iai nei ona po e pei ona iai suiga o le tau, ma o nei mea uma o le foafoaga a le Atua. O le aisa foi ia latou malamalama e le iai ni ona uiga tumau aua e mafai ona toe liua e fai ma se tasi meta e pei ona fausia ai lenei lalolagi.
Na o faatasi aoaoga a faiaoga ma galuega e pei ona avatu ai le loli aisa ma taumafai e faatinoina ai le polokalame. O le vai e mafai ona liua ma aisa poo se mea faitino malo, ae e mafai foi ona liua e avea ma suavai. Ma o auala ia na faamalamalama lelei e faiaoga i tamaiti le suiga o loo iai oloa aemaise foi o le tau. Na fiafia tamaiti e sua le aisa ma paipai i le aisa ao malo ae ina ua liu suavai le aisa sa fesili ai loa tamaiti i faiaoga poo fea le aisa. Sa toe faamalamalama e faiaoga i tamaiti le mea ua tupu i le aisa.
O le polokalme lenei e aoga tele mo le tapueina o le olaga o tamaiti aoga aua lona tuputupu a’e i le lumana’i ma ana tapenaga mo lona ola a’oaoina. O se tasi lea vaega ta’ua, o le a’oaoina o tamaiti i le suiga o le soifuaga ua iai lenei foi talutalufou. Sa ta’ua lenei polokalame o le Winter Wonderland. Sa talanoa le suiga o le soifuaga ma polokalame a le Atua e ala i ana foafoaga.
O le talitoniga o faiaoga e amata aoaoina atu fanau mai lo latou laiti i mea ua tutupu a oo ina matutua ua latou malamala ai i le suiga ua iai. Pei lava o upu a le Tusi a aoao le tama o laititi e tusa ma ala o le Atua ma le faasinomaga manuia a matua a oo foi ina matua e le toe tea ese ai.
