Faaalia le lagona fiafia o le afioga i le Peresetene o le iuni lakapi a le Aukilani Samoa ia Tapuai Siaosi i le matagofie o le faagasoloina sa iai taaloga i le Aso Toonai ua mavae. Ua mae’a ona toe teuteuina le mataupu sa tulai mai i le vevesi sa iai au i le amataga o le taamilosaga, ma ua iai foi faaiuga ua tuuina atu i au taitasi nei sa mafua ai le vevesi. O faaiuga ua tuuina atu iai, o iu gafono ia a le komiti faafoe ua iai tulafono e fai ma taiala aua le manuia o le iuni lakapi i lenei tausaga.

O Laulii ua faamalolo nei ma le iuni lakapi, ae o le United Brothers Seki Works sa tuuina atu i ai le faasalaga tupe e tusa ai ma aiaiga o tulafono. O isi ‘au e lua o Vailele ma Satoa e lei ia se faasalaga na tuuina atu i ai e le komiti faafoe ona sa manino lelei le lipoti a le laufali sa faatinoina le taaloga e faapea, e moni sa vevesi ma fusu le autaaalo ae sa toe mafai lava ona foia le vevesi i le faatautaiga a le laufali ma toe faaauau ai le taaloga ma taunuu ai i se taunuuga manuia, ma sa toe faalelei lava tama taaalo e pei ona masani ai uiga o taaloga.

O le puipuiga a le afioga i le peresetene ia Tapuai Siaosi ma le komiti faafoe i le fai o faaiuga tatau mo ‘au e vevesi i totonu o taaloga, ona e manumanu i le taamilosaga a le Aukilani Samoa ina ne’i taofia mai e le iuni lakapi a Aukilani (Auckland Rugby Union) auā o le iuni a tatou o loo i lalo o le faamalu lea, auā le manuia o le faagasoloina o taaloga.

O le mea foi sa tupu i taaloga i le Aso Toonai sa malamalama lelei le iuni lakapi a Aukila i gaioiga i fusuga sa fai, ma o le ala lea e puipui malu ai le soona faavevesi o ‘au i totonu o le taamilosaga, aemaise ai o le manumanu i kamupani o loo latou lagolagoina le Aukilani Samoa ina ia aua ne’i toe faamaamulu se auaunaga ona o le fufusu soo o ‘au.

Ua avea le faaletonu sa tulai mai i le amataga o le taamilosaga ma auala ua a’oa’oina ai amio o tama taaalo aemaise ai o le au maimoa. Pei ona molimauina e le au tapuai ma le komiti o taaloga le suiga sa iai le Aso Toonai ua mavae i au taitasi, ua finau uma au i le manumalo ma ua faafaigata ai foi le tutusa uma o au e taaalo. 

Ae sili ai le faafiafiaina o laufali sa faafoeina taaloga, ua faafaigofie foi le latou pito laau i le faatautaia o taaloga taitasi. 

Tumau le talita

Ua lua Aso Toonai talu ona amata le iuni o loo tumau pea le talita ia Mountfort Brothers lea sa latou umia mai i le tausaga ua mavae.  O loo malosi pea le puipui a Mountfort Brothers i le latou talita ma le latou talitonuga e tatau ona toe umia i lenei tausaga. O Iva sa latou luiina muamua le talita, ma e lei manuia, ma sa toe lu’iina foi e le Moatoga i le Aso Toonai ua mavae e lei maluelue lava.

Ae o se taaloga mataina le taaloga lea sa iai, ona o le 70 minute o le taaloga sa sili ai ai o le Moatoga ma ua iai lava le faitau a tagata tapuai ua maluelue fao o le talita. Sa le faavaivai le osofai ma le puipui a Mountfort Brothers i le latou toe finauina o le laina sikoa. Ma o le toe minute o le taaloga ae toe laasia ai e le Mountfort le laina sikoa ma toe suia ai lagona o tagata e faapea ua toe tumau le talita ia Mountforts Brothers. O ai o le taaloga Mountforts Brothers 33 Moatoga 27.

Iuga o Taaloga Aukilani Samoa

Tama o le Mau 73 vs Marist OB 0

Aai o Fonoti le tupu 22 vs Saleimoa 15

Salevao Nofoalii 38 vs Iva 11

Faleula Eagles 20 vs United Brothers 0

G-Mana Vailele 29 vs Laumua o Tumua 24

Nations 34 vs Sataoa 17

Mountfort Brothers 33 vs Tama o le Moatoga 27