UB40 Concert Samoas 50th Independence
Ua sauni le Faaili ma le Aufaipese lauiloa a le UB4O, e malaga i Samoa e faafiafia, o sona lea sao mo le faamanatuina o le 50 tausaga o le tutoatasi o Samoa.
O le kamupani Telefoni a le BlueSky ma le Purely Reggae, ua latou tuufaatasia se koneseti matautia mo Samoa ma le Pasefika atoa mo le uluai taimi.
O le Aso Faraile aso muamua lea o Iuni ua fuafua o le a pa‘ō ai musika televavave toe faateletelegese tu‘itu‘i leotetele a le UB40 i le ogatotonu o le Taulaga i le nofoaga o le Apia Park Stadium i Apia lava.
O le vaiaso na tea nei, Aso Tofi aso 15 o le masina nei lava, na faato‘ā avanoa ai pepa ulufale mo lea koneseti, mo faatauga a tagata lautele i luga o le www.purelyreggae.ws.
I luga o le Twitter o loo ta‘ua ai se faamatalaga mai se tasi o alii o le UB40, le susuga ia Brian Travers, o loo ia ta‘ua ai lagona fiafia i le sauni ai mo Samoa.
Fai mai a ia, ua sauni e faafiafia ma taina ni pese mo manaoga o tagata Samoa, ae o le a fai mea faalogo pea ia i latou o loo nafa ma le faalauiloaina o le koneseti i le atunuu.
Na faamaonia mai e sui o le kamupani vaalele a le Virgin Samoa e faapea, o le Faaili ma le Aufaipese tautaua i le lalolagi le UB40, o se tasi lea o aufaafiafia ua faatulagaina i faafiafiaga o le Tutoatasi ma le faamanatuina o le Iupeli Auro, poo le 50 tausaga o le malo Tutoatasi o Samoa.
O se tasi lenei o vaaiga maoa‘e ua mautinoa lava o le a matuā faatosina ai le toatele o turisi ma tagata tafafao i atunuu i fafo, e agai ma asia Samoa.
Ona o le fiafia ma le manaomia tele o lea foi aufaipese matautia i pese ma faafiafiaga ma ana musika, o le a tosoina le toatele o tagata eseese i totonu o le atunuu, i aso faapitoa o lona malo faamanatuina.
E lē gata i tagata tafafao maimoa atu i fafo, ae faapea foi alo ma fanau ma tupulaga talavou a le atunuu lava latou ia, ona o le tosina ma le fiafia, aemaise ai o le fia vaaitino mo se taimi muamua i sui o le UB40.
Ua leva ona tautaua ma lē faoa le tulaga maualuga ma le manaomia o musika ma pese a le UB40, i luga o le maketi o faasalalauga ma pisinisi o le lalolagi atoa.
O se tasi lea o talafaasolopito e lē gata ia Samoa, ae o lea foi Faaili ma le Aufaipese lauiloa i le lalolagi, pe afai ae taunuu lea fuafuaga e fia auai i le aso faamoemoeina o le atunuu.
Ae na faamaonia foi ina ua maua e le Samoa Times i luga o polokalame ma le faatulagaina o malaga a le UB40, i lana kalena faaletausaga, o loo ua mae‘a ona tamau ai le aso ma le taimi tonu o le a iai i Samoa.
O loo iai faatasi ma faafiafiaga a se tasi o alii tautaua le susuga ia King Kapisi.
E ui ina tele le mau faafiafiaga ua tapenaina mo le aso faamanatuina o lea aso fiafia mo tagata Samoa, ae o le taunuu o le UB40 i Samoa ma lana koneseti, o se tasi o tulaga o le a laualuga ma tulimatia e le toatele o malo asiasi o aso e lima e pei ona faatulagaina mo le Tutoatasi 2012.
E tele faafiafiaga eseese ua tapena i ai le komiti o le tutoatasi mo le faailogaina o le Iupeli auro o Samoa talu ona maua lona malo tumaoti mai pulega faakolone, ma o nisi o ia faafiafiaga ua tapena i ai nisi o nuu ma afioaga faapea ni aufaafiafia o le a malaga mai atunuu i fafo.
O se talanoaga faasamasamanoa ma le sui o le Malo o Amerika i Samoa ua ia faailoa ai o loo tapena se aumalaga a le Malo o le Iunaite Setete e malaga mai mo aso faailogaina o le tutoatasi e aofia ai ma se aufaafiafia e lei faamautuina i le taimi nei poo ai tonu lea aufaafiafia.
Ae o se tasi o faaili lauiloa i le lalolagi ma le Pasefika i ana fatuga o pese Reggae, le UB40 o le a faafiafia ma faia sana koneseti tele i le aso muamua o le tutoatasi lea o le a faia i le malae o taaloga i le Apia Park.
O loo aumaia lea faaili logologoa e le kamupani telefoni o le BlueSky lea ua amata faasalalauina nei le faatauina o pepa e ulufale ai e maimoa lea faafiafiaga.
