Saili tupe Gagaifomauga toe fausia le falemai i Safotu

Ua tolu tausaga talu ona tatala le toe fausia e le Malo o le falemai faaitumalo o loo i Safotu i Savaii, peitai e ui ina matagofie le galuega ae ua lē lava potu mo gasegase o loo autovaa atu mo sailiga togafiti.

O le falemai sa iai muamua sa oo i le 14 gasegase e mafai ona taofia i le falemai faaitumalo, ae o le toe faafouga ua na o le toatolu gasegase ua mafai ona ofi ai i potu na fausia.

O le mafuaaga lea ua tapena ai faipule o itumalo o Gagaifomauga Numera 1, Gagaifomauga Numera 2, ma Gagaifomauga Numera 3 e fai se sao o itumalo e tolu e fesoasoani ai i le faasoa a le Malo, e ala i le saili tupe atu i fafo mo se seleni e faatele ai le falemai.

“Manatua foi e lē na o Gagaifomauga tasi, lua ma le tolu o loo talosaga i le Malo o loo talosaga foi Samoa aoao.

O loo matou faatali lava i le Malo ae matou te talitonu a faatali nei i le faasoa a le Malo e lē iloa le taimi e faatino ai, ma o le autū lena o se manatu ia i matou o faipule le tofa Tuilo‘a Anetelea, o Sooalo Mene ma a‘u nei, e fai so matou sao”.

O le finagalo lea o le fofoga fetalai le susuga Laauli Leuatea Polataivao e tusa ai ma le faamoemoe o loo tapena i ai mo le malaga atu i Niu Sila i se taimi e lē o toe mamao e sailitupe mo le toe faateleina o le falema’i.

“O le talitonuga ia i matou o loo tutu i le tofi, e tele se galuega e mafai ona tuufaatasi ma faamalamalama i Tupu ma Ee o le itumalo o loo alala ma papa aao i Niu Sila ma Ausetalia ina ia tutufaatasi e togi se tatou maa.

Talitonu foi o lenei falemai e lē mo se tagata e toatasi ae mo Savaii atoa, ma o le falemai lea tatou te tua i ai pe a malaga mai foi e asiasi i aiga”.

O loo fuafua faipule e toatolu o loo taulamua i le galuega e fau ia lelei le falemai ina ia ausia tulaga maualuga i le sulufai o tagata e saili togafiti i gasegase e aafia ai. O le tau la o le galuega e lē o faatagā fai e pei ona saunoa le Fofoga Fetalai.

E luaselau afe ma ona tupu se tinoitupe o loo fuafua e saili mo le fausia o le falemai ia maua ai ni potu a itiiti mai e 14, e taofia ai gasegase.

O loo fuafua foi e fausia nisi o vaega ia ausia ai manaoga o galuega faafomai mo le maota gasegase i Safotu. O le a fausia ai foi se fale e faamautu ai tausi soifua faapea se fale e faamautu ai se fomai.

I fuafuaga mamao na saunoa Laauli Leuatea a tusa ai ma sailiga fesoasoani o loo manatu e saili mai fafo se fomai e galue tumau i le falemai.

“E mafai lava ona saili atu i Saina mo se fomai, ona taumafai lea pe a talafeagai ma fuafuaga e faatupe lava e itumalo le vaaiga ma le tausiga o sea fomai”.