Ua sua ma faamamā le lima selau eka o le fanua o le afioaga o Sasina i Savaii o le a faato‘a ma toto atoa i le laau o le nonu.
O le vaiaso nei na amata ai lea galuega ma le fuafuaga a mae‘a ona sua atoa le fanua ma faataoto auala taloto e vavae ai vaega eleele o le lima selau eka, ona amata loa lea ona toto.
“Masalo o le toga nonu pito sili lea ona telē i Samoa. O le fuafuaga ia e lē o mafai ona solomuli ona o le tulaga i le talitonuga i le mea sa ou agai i ai ma fai le asiasiga i Saina ma fai la‘u tautinoga i le atunuu, i le fuafuaga a le afioga Tupailelei Jack Chen ma o le tulaga foi lea sa faasalalau ia Samoa atoa e ui lava foi ina tou faafofoga i tala o le ea i tala faafaamasinoga i ni tuuaiga a ni papalagi i Niu Sila o Jack Chen ia o le faamasinoga e aumai ai le mea moni”.
“O lea foi e la‘u mai i Samoa nei tala ma faapea ua ta‘uleagaina ai le suafa o Tupailelei, ae ua i luma o le faamasinoga o le faamasinoga tonu lena”.
O le finagalo lea o Laauli Leuatea Polataivao, o le Fofoga Fetalai o loo taulamua faatasi ai ma nisi o faipisinisi o le atunuu e atina‘e le laau o le nonu mo le faamoemoe e faatau atu i Saina.
Faaalia e le Fofoga Fetalai, o le Aso Lulu, 14 o Mati 2012 na tatala ai le kamupani tele i Saina o le a utu fagu ai le sua o le nonu o loo la‘u atu mai Samoa ma isi atunuu o le Pasefika e pei o le Atu Kuki.
“Sa tuuina mai faamaumauga ma lipoti ananafi e ave ai foi le faamalosiau i le itumalo ina ia o latou mautinoa ma talitonu pea i le faanaunautaiga o lenei atina‘e ina ia faaauau ai pea le totoina o le nonu i le atunuu”.
“Atonu o loo iai nisi o faafitauli o loo tulai mai i le aoina o le nonu i le atunuu ae o le va lena o le afioga Tupaimanaia Phillip McNiholl ma Laauli Michael Jones, o le la kamupani lena o le Pure Pacifica o loo aoina le nonu i Samoa, ae pei ona tou silafia o aiaiga faafaamasinoga o loo aafia ai Jack Chen o loo tau faamanino ai tagata o loo tuuaia ua taofia ai a latou teuga tupe seiloga ua uma le faamasinoga”.
O le agaga o le itumalo o le Fofoga Fetalai e lē o faatafa ona na faaalia e Laauli Leuatea, ua talitonu i lana silasila i le malaga atu i Saina o le manuia lea mo le lumanai.
E lē gata ina atina‘e e lona itumalo le nonu, ae ua faapea foi ona toto ai ma le ‘ava, niu, ma le kofe o ni laau tau faatoaga o loo atina‘e e le Malo.
“Silasila foi i le tau o le nonu sa iai, sa $4 tala i le paelo, ia la lea o le a savalivali nei i le $9 tala ma e oo atu i le tausaga fou ua sefulu tala, ma e lē mafai ona toe alu i lalo”.
Faaalia e Laauli e leai se faipisinisi e alu ni ana tupe se tele i se taumafaiga faapea ae iloa e lē maua ai se manuia.
