Faafetai le sui Palemia agalelei o Samoa i atunuu i fafo

Ua faafetaia e le tamaitai Sui Palemia o le Minisita foi o le Matagaluega o Tina & Tamaitai, Atinae o Nuu ma Afioaga ma Agafesootai, Afioga Fiame Naomi Mataafa, le lotonuu moni o tagata Samoa o alaala ma aumau i atunuu e mamao e pei o Niu Sila, Ausetalia, Amerika ma isi atunuu.
O le tamaitai Minisita sa avea ma sui palemia i le taimi na tauaao atu ai le foai a nisi o alo ma tamafanau a Samoa i Niu Sila ua faaigoaina le latou sailiga fesoasoani o le Tsunami Samoa 09.
E $105,000 se tinoitupe na faamaopoopo e lea vaega o Samoa i Aotearoa, lea ua tauaao e le Malo le $55,000 e fesoasoani ai i le fausia o laoa ma maota o aiga na faaleagaina.
“Taatia atu i le Malo atonu lava e maua ai ni nai fale se tolu i le matou fesoasoani”, o le saunoaga a le tofa Olo Puni sa avea ma sui o le Tsunami Samoa 09 e molimoli se saunoaga i le autu o le foai.
Na matauina e le tusitala e pei na tau tutulu loifofoga o le Sui Palemia ina ua saunia faalaeiau e avea ma sui o le Malo ma le atunuu, ina ua ia ta‘ua le tulaga lotonuu moni ma le lotoalofa o le tagata Samoa, tusa pe aiga pe leai se sootaga ae soo se mea lava na silafia ai ma faafofoga se Samoa i mafatiaga o le sunami, sa aumai a latou fesoasoani.
E oo lava i tagata o le atunuu o alaala i Samoa, sa molimauina le masaa atu o lo latou alofa ma le agalelei i nai tagata na sili ona mafatia, aemaise o le mutimutivale o le alofa ma le loto nutimomoia ona o soifua o fanau ma matua, uso ma tuafafine na fano i le sunami.
E le gata ina masaa le lima mafola o le atunuu i fafo, ae o isi tagatanuu ua lagona le loto fia foai mo mafatiaga. O le seleni e selau ma le lima afe ua faaopoopo i ai ma le pusaoloa poo le container 40 futu o meaalofa mo fanau o le Kerisimasi. O le isi $50,000 o le foai ua vaevae e pei o le tai sefulu afe ua tuuina atu i le Habitat Humanity, Womens in Business, ma le falemai tumaoti o le Medcen i Vailima.
E tai lima afe ua foai mo le Iunivesite Aoao a Samoa e fesoasoani i se teugatupe mo fanau e faaletonu le totogiina o o latou pili aoga, o le lima afe mo nai aoga faataitai na faaleagaina i le sunami, faapea le isi lima afe mo aoga tulagalua ma aoga maualuluga na iai vaega na faaleagaina.
Ua tauaao atu foi ni laulau se luasefulu mo le aoga Tulagalua a Saleapaga, ma pusa solo taele mo falemai faaitumalo i Lalomanu Aleipata ma Poutasi Falealili.
E 300 foi leitio ma pusa maa moliuila ua foai e le Tsunami Samoa 09 mo aiga uma ua faaleagaina a latou meatotino e pei o fale, ma isi totoga o totonu o le aiga e pei o leitio faalogologo.
Ua faaopoopo i ai ma le 2,500 o ato ua fafao i ai nai meaalofa mo fanau i nuu ma afioaga na sili ona afaina. O le susuga Papaliitele Pita Fatialofa na avea ma Tamā o le Kerisimasi na te tauaaoina atu ia meaalofa.