Faatoese ua lagona lona sese, tagolima ma luluu le $210,000

“Avea ia lenei avanoa ou te faatoese atu ai i le atunuu aemaise nai tama ma tina matutua ona o so‘u leaga i se taimi ua mavae na faaletonu ai ona maua le latou penisione, ae ua ou fiafia o le a ou alu e tuli lo‘u faasalaga”.
O tala ia na mafai ona mamulu mai i le fofoga o Sione Taateo, ina ua maea ona lau se faaiuga a le faamasinoga maualuga i lona moliaga e tasi o le gaoi ma ua faasala ai i le tolu tausaga i le falepuipui.
O ia lea na molia i le gaoiga o le $400,000 o le penisione a tagata matutua mai le ofisa o le NPF, faatasi ai ma le susuga Tautai Fata sa galue o se ave taavale mo lea faalapotopotoga a le Malo.
O le Aso Lua, aso muamua o Tesema 2009 na lauina ai le faaiuga a le faamasinoga lea na faamatalaina ai e le alii faamasino le Afioga Vui Clarence Nelson, e iai lona talitonuga o se tupe maoae lea ia gaoia ma oo atu i le faamasinoga. I tolaulauga a leoleo na faaalia ai o Sione na ave i ai e Tautai Fata le ki o le potu o le ofisa o le penisione i le afiafi o le Aso Toonai 20 o Oketopa 2008. Ina ua ulufale Sione i le ofisa na ia faaaoga ai loa se sikukalaiva (screwdriver) e tatala ai le potu sa teu ai pusa tupe ua uma ona faavasega i ai teutusi o le penisione.
O le maea ona faatino o lea gaioiga na agai ane ai Sione ma le $210,000 tala ma oso loa i se taavale laititi laupasese ma agai ese, ma o le silasila a le faamasinoga o se gaioiga na matua fiafia tele ai Sione ona ua mafai ona ia faia e aunoa ma se isi na faalavelave ia te ia.
O Sione e iai nisi o ona moliaga i le talepe fale ma le gaoi sa molia ma nofosala ai i le falepuipui, ma o lona moliaga mulimuli lava o Mati o le tausaga e 2006. E manatu le faamasinoga atonu o se lelei o le gaioiga na tulai mai ua mafai ai e le pulega o le NPF ona toe silasila i le malupuipuia o tupe a le atunuu o loo i lalo o le latou vaaiga, ae peitai e matuia tele le solitulafono na faia e Sione ma e ao ai lava ona faia se faasalaga faafalepuipui.
Na faaalia e le tamaitai loia sa tu mo lea taulealea e tusa ma le $110,000 afe tala se tinoitupe na mafai ona toe maua ma faafoi atu i le pulega o le NPF. Na mafua ona faailoa lea tulaga ona o se faaaliga a le alii faamasino e le o manino atu i faamaumauga a leoleo pe sa toe maua se isi vaegatupe o le $210,000. Ua talia ai e le faamasinoga le faamatalaga a le loia ma o se isi lea itu lelei mo Sione Taateo i sona faasalaga.
O le isi itu lelei o lona ioeina o le moliaga ina ua toe faia se teuteuga e leoleo ma faaitiitia ai le aofaiga o le tupe e molia ai le taulealea mai le 400 afe ma ona tupu i le na o le $210,000.
O se isi itu lelei o le lagolago atu a Sione i suesuega a leoleo ma ua malie foi e molimau mo le itu a leoleo faasaga i le alii o Tautai Fata o loo tetee i le moliaga ma sona aafiaga i le gaoia o lea vaegatupe tele.
O Me o le tausaga fou e faatoa suesue ai le moliaga o Tautai lea o loo nofo taofia nei i le falepuipui ma ua toe tuli uma tausaga o lona faasalaga o le fasioti tagata faamoemoeina sa molia muamua ai, ona ua ia soli aiaiga o le palola na magalo ai.
E lima tausaga na amata ai se faasalaga a le faamasinoga, peitai na toesea atoa le isi lua tausaga totoe ai le tolu ua nofosala ai nei Sione Taateo i le falepuipui.