Teena le talosaga a Ropati Nauer e fia alu i tua i lona aiga

Ua teena foi e le Faamasino Sili, Afioga Patu Tiavaasue Falefatu Sapolu, le talosaga a le alii o Ropati Nauer e ala atu i lana loia, mo le tatalaina o ia i tua i lona aiga e faatali ai le faaiuga a le faamasinoga i lona moliaga o le fasioti tagata pa’ivalea.
Sa le manatua e le afioga i le Faamasino Sili, Patu Tiavaasu‘e Falefatu Sapolu, le alii o Ropati Nauer, ma lona faamasinoga na faamaonia ai le moliaga o le fasioti tagata paivalea ona ua fitu tausaga o sola ese lea alii ma Samoa, a o lei faia se faaiuga ia te ia i lea solitulafono.
Na fesili le faamasino sili i loia a leoleo, pe o le mataupu lea na fofogaina o le a lau le iuga ae ta‘u ane ia te ia ua sola ese ma Samoa le o loo molia.
Na faatoa silafia e le Faamasino Sili ina ua logo i ai e loia a le Malo, e le mafai ona talia le talosaga a le loia a Ropati mo ni aiaiga e tatala ai i tua lea alii.
Na tuua Samoa e Ropati ua 29 tausaga o lona soifua i le tausaga e 2002, ae ua foi mai ua 36 tausaga o lona matua, peitai e lei suia ai ona foliga ina ua tulai i le pa mo tagata solitulafono.
O le alii o Ropati Nauer ua toe taofia nei i le vaaiga a leoleo e faatalitali ai le aso 17 o Tesema e aumai ai se faaiuga i lona moliaga o le fasioti tagata paivalea.
E tele tulaga na aliali mai i le tausaga e 2002 ina ua amata ona fofogaina ma suesue molimau a leoleo faasaga i lea alii, ona na tuuaia ai lava Ropati i lona aafia i se taumafaiga e faasola ai i fafo se tasi o molimau o se tamaitai. Peitai i le faagasologa o lea faamasinoga sa lava molimau a leoleo e faamaonia ai lona moliaga o le fasioti tagata paivalea.
E iai nisi o lona aiga ma ana uo na faatasi atu i le faamasinoga o le alii, ma o se avanoa na feiloai ai ma nisi o lona aiga, aua na aumai lava i Niu Sila faasasao loa i le potu taofia i le falepuipui i Tafaigata.
I se feiloaiga ma le Komesina o Leoleo, le Afioga Lilomaiava Fou Taioalo na ia faaalia ai, e faatoa faia ni moliaga faaopoopo o Ropati i lona sola ese a o faatali se faaiuga a le faamasinoga, pe a maea ona aumai se iuga o le moliaga o le fasioti tagata paivalea. Faaalia foi e le Komesina o le vaega o leoleo faavaomalo le Interpol na latou sailia Ropati ma maua ai i Niu Sila ma toe aumai loa i Samoa.
O se gaioiga ua lagona ai le fiafia o le Komesina o le Matagaluega o Leoleo ma Falepuipui ona ua iloa nei le taua o le Interpol ina ua avea Samoa ma sui auai o le faalapotopotoga o leoleo faavaomalo. O le alii o Ropati na mafua ona molia e leoleo ona o se faalavelave na oso ese ai se tamaitai na malaga i lana taavale ma maliu ai.
O lea tamaitai sa pikiina mai e le ua molia ma se isi tamaitai ma le faaupuga e o e momoli, peitai na agai le taavale i Aleisa ma oso ai loa i fafo le tamaitai na maliu.
Sa molia lona tuafafine o Luisa ma lona toalua o Ricky Westerlund i le faia o se gaioiga e faasola ai Ropati.
O le suesueina o le moliaga o le ulugalii na iloa ai i molimau a leoleo e faapea o le pepa fanau o le uso o Ropati o Norman na faaaoga e Luisa e toe talosaga ai se isi tusifolau fou, lea na mafai ai ona sola ese lea alii.
O Ricky na aafia i le solitulafono ona o ia lea na momoliina Ropati i le malae vaalele i Faleolo.