Na faalologo ma silamaimoa le aumalaga mai Saina lea o loo talimalo ai lo tatou atunuu i Samoa nei, ina ua faatino e nisi o le aufaigaluega a le malo le ‘ava e faafeiloai ai le malaga mai, o le sui palemia o lea malo atoa ai ma le silia i le 200 o le aumalaga o tagata faipisinisi, faapea le 30 o sui minisita. O le auai mai ai o ia tagata, se’i fefaasoaa’i i le fonotaga lea o le a usuia amata i le Aso Gafua, 21 Oketopa i Samoa nei, i tulaga tau le tamaoaiga a atunuu o le Pasefika.

E lē gata i lea ae o le fia faamautu atili o nisi o fesoasoani o loo faamatuu mai e lea malo mo Samoa, aemaise ai o nisi o foai fou e pei ona iai sainigalima i le afiafi o le Aso Toonai, 19 Oketopa i le faletalimalo o le Sheraton Hotel i Vaisigano ina ua mae’a ai se fono umi pe ā ma le itula o faia.

O le ‘ava na mulia’i i ai le polokalame aloaia a’o lei faia le taumafataga afiafi, ma e maniti tino ina ua gagana lava le Samoa ia i lana gagana, ma faatino ana tu ma aganuu, poo le ā foi le lē malamalama o le Saina, ae ua nofoilo lava i latou ina ua aloaia le ipu ‘ava muamua i lo latou taitai, o le faailoga o le faaaloalo o lo tatou malo ma ona tagata ma le talimalo lelei.

E fitu ni maliega na sainia ma o matagaluega e pei o le Alamanuia ma Leipa, o le Matagaluega o Aoga lea ua faamanuiaina ai nisi o aoga tulagalua i le atunuu e pei o St Theresa, Lepea Primary, ma Apia Primary, e lē gata i lea o le matagaluega foi o galuega a le malo, Matagaluega o Faatoaga, faapea ai le Matagaluega o le Va i Fafo.

E lē itiiti le sao o le malo o Saina mo Samoa, ma e ui ina tele lafoga e ala mai i faasalalauga ma ripoti i le lē fiafia o nisi i le oo mai ai o Saina ma lona faatuputeleina i totonu o Samoa, peitai o loo iai lava ma vaaia, e lē o ma nofonofo ai lo tatou malo e saili pea fesoasoani ina ia manuia tagata uma.

Sa molimauina ai foi se tasi o taumafaiga ua tino mai lea sa taumafai ai lo tatou malo e auina atu ni tamaiti aoga, e a’oa’oina i lea atunuu, ia foi mai ma le tomai e faatino ai galuega. 

O le Aso Toonai la sa vaaia ai le silia i le sefulu i latou sa a’oa’oina i Saina ua avea nei ma faaliliu upu mo lea aumalaga, o i latou ia, o nisi e ta’i lima tausaga o aooga ai i Saina ua foi mai ma faailoga ma o loo galulue nei i nisi o matagaluega a le malo.