O le tusi a le Palemia na ave i le Minisita o Fesootaiga ma Faamatalaga Tekonolosi, Afamasaga Lepuiai Rico Tupai ma le Pule o le Pule Faatonu a Samoa, e ao ona toe silasila ane i le tau e ao ona totogi e faletelevise i le atunuu e fesootai ai i le Digital TV i le masina.

O le tusi a le Palemia o loo ia faaalia ai, sa faapea lava ia o le a maua se faamāmā avega a le mamalu o le atunuu i le faatuina o le Digital TV, peitai o lea faatoa a ia iloaina, o le fasiotia o faletelevise ua leva ona faia le tautua i le atunuu.

E 7 faletelevise i Samoa, ma ua mafuli pulega o faletelevise nei i le lē fiafia i le tau ua tuuina atu mo latou pisinisi e totogi i le masina e tasi. O le mafuaaga foi lea ua ala ai ona oo le faaseā i le Palemia ona o le taugata tele o le totogi o le Digital Televise.

Ua faaigoaina e le Palemia le tau e totogi e faletelevise i le masina e tasi ua o se “malapagā”. E silia i le tolusefululima afe tala e totogi e le faletelevise e tasi i le kamupani a le Digital TV i le masina e tasi. O lona uiga e silia i le 2 miliona tala le tupe e maua e le Digital TV, poo le kamupani a Ah Liki lea ua o latou mauaina le Digital TV. E limasefulu tala $50.00, e faatau ai le tamai pusa e le aiga e toatasi e faapipii i lana televise e sui mai ai le analogue i le Digital TV.

Ae afai la o se tala faataitai, e 80,000 le aofai o aiga i Samoa, faatele i le $50.00 i le tamai pusa o lona uiga e faaono oo atu i le $4 miliona tala le tupe e maua e le kamupani a Ah Liki, auā e na o le pau foi lea o le kamupani i totonu o Samoa, o loo faatau ai tamai pusa ia.

O le fesili la, afai ae 2 miliona tala e maua mai i faletelevise, ona faaopoopo lea i ai o le 4 miliona tala o le tupe e maua mai i tamai pusa ia e faapipii i lau televise e sui mai ai i le analogue i le Digital, e fia la se tupe

E ono miliona, 6 miliona tala le tupe e moomia e faagaioi ai le Digital TV e pei ona sa faatulaga mai ai i le amataga. Na faasalalau i fafo, ma na malaga foi sui o le malo e faalauiloa i Saina, peitai  e lei maua se isi ona e taugata lona faagaioiga.

Na toe foi mai lea i Samoa, na taumafai lea o le Pule Faatonu e faatalanoa faletelevise i le atunuu i se faiga e talafeagai ma Samoa, e aofia ai ma le faamoemoe pe faaono mafai ona tuufaatasia faletelevise i le atunuu, peitai e lei taunuu i se taunuuga lelei, seia oo ina ofo atu loa Ah Liki latou te mafai ona faatino. Ua tasi le vaiaso talu ona faalauiloa le Digital TV i le atunuu.

Fai mai le Palemia i lana tusi, ua faailoa atu tau e gafatia e faletelevise ona totogi i le masina, lea e faapea e na o le sefululua afe tala $12,000 i le masina ona gafatia ona totogi.

E ono faletelevise i le atunuu e aofia ai le TV1, TV2, TV3, TV4, Kingdom TV ma le Good News TV.