O le fonotaga a le autusitala i Samoa ma le pulega a le Iunivesite Aoao o Samoa e faalauiloa aloaia ai le filifilia ai o Aiono Dr Alec Ekeroma ma Pule Sili fou o le Iunivesite, na maua ai foi ma le avanoa e faamanino mai ai nisi o suiga ua mae’a ona teuteuina i le faavae o pulega o le Iunivesite Aoao o Samoa.
O ia suiga fou ua faia i le taimi lenei mo le agai i luma o galuega fai a le Iunivesite poo le NUS.
Mai le tele o tausaga e pei ona silafia e le atunuu sa faalupe ai le pule sili o le Iunivesite, o le Tapaau o le Iunivesite, ae o le gagana peretania sa faalupe ai o le Vice Chancellor. Ae o le taitaifono sa faalupe i le gagana Samoa, o le Faaao o le Iunivesite.
Peitai o le suiga tele ua faia nei e le Iunivesite, ua lē toe faaaogāina ai le upu Tapaau ma le Faaao, ae ua suia le upu Tapaau i le Pule Sili o le Iunivesite, ae o le Faaao ua suia nei o le Taitaifono o le Iunivesite.
Faaalia e le Taitaifono o le Iunivesite Aoao o Samoa, Aeau Chris Hazelman, o le faia o nei suiga tele ina ia ogatasi ma le faalupega Samoa o loo faalupe ai le tele o faauluuluga o Matagaluega a le Malo, atoa ai ma le faaaogāina lelei o le gagana Samoa ina ia faafaigofie ai i le maitau mai a le atunuu. O loo tumau pea ona faaaogāina faalupega sa iai muamua i le gagana peretania e pei o le Vice Chancellor, o le Pro Chancellor poo le President foi, ina ia ogatasi ai ma faauluuluga o nisi o Iunivesite i atunuu e mamao o loo iai le latou faiga paaga ma le NUS poo le Iunivesite Aoao o Samoa.
E iai le talitonuga o le tatou nusipepa, o nisi nei o suiga ua faia nei i le Iunivesite talu mai nai faafitauli na iai talu ai, lea la na muamua ona filifilia ai le Pule Fou i le vaiaso talu ai, ae o lenei ua suia ai le faalupega o faauluuluga o le Iunivesite.
E pei ona silafia o se tasi lenei o vaega na ta’ua ai i se lipoti faapitoa mo ni suesuega na faia i le pulega talu ai o le Iunivesite, o le toe Iloilo lea e le komiti faapitoa ao lei filifilia ai le pule fou ua iai nei, o malosiaga e tatau ona ave i le pule fou o le Iunivesite pe a filifilia.
Ua talosagaina foi e le taitaifono o le NUS ia Aeau Chris Hazelman le mamalu o le aufaasalalau Leitio, Televise ma Nusipepa, ina ia faaaogāina suiga fou ua faia nei e le NUS i soo se taimi o faasalalauga e faalupelupe ai tofiga maualuluga o le NUS.
E iai le naunautaiga o le Taitaifono ia Hazelman, o se isi lenei laupepa fou mo le Iunivesite auā le agai i luma mo le manuia o a’oa’oga a le fanau, aemaise o le tulai mai ai o le susuga ia Aiono e avea ai ma Pule fou o le Iunivesite Aoao o Samoa mo le isi tolu tausaga i le lumanai.
O le masina o Ianuari o le tausaga fou 2020, faatoa amata aloaia ai Aiono i lona tofiga fou o le Pule Sili mo le NUS, e pei ona ia faailoa talu ai lona sauni ai lea e tuuina mai nisi vaega lelei mo le ola a’oa’oina o alo ma fanau a Samoa i totonu o le NUS.
