Rev Dr Upolu Lumafale Vaai, ua tofia nei i le tofiga Pule o le Pacific Theological College

Rev Dr Upolu Lumafale Vaai, ua tofia nei i le tofiga Pule o le Pacific Theological College

O le tofia o se tasi o tama fanau a le atunuu e faauluulu iai le Kolisi o Suesuega o le Tusi Paia – le Pacific Theological College i Suva i Fiti, o se tofiga e lagona ai le fiafia ma le faagaeetia aemaise o le lotonuu o soo se Samoa, i soo se tafa o le Kelope ona e lē o se tofiga e soona totofi iai soo se isi.

O le Kolisi o le Pasefika poo le Pacific Theological College – PTC e autovaa iai uma a’oa’o ma o latou faletua ua faamanuiaina e toe faaauau ai a latou suesuega i faailoga maualuga tau Tusi Paia na a’oa’oina ai i totonu o Kolisi Faafaifeau a soo se Ekalesia i totonu o latou atunuu.

Ma e na’o i latou foi ua filifilia faapitoa e a latou Kolisi Faafaifeau e fai ma sui o latou Kolisi ma ausia togi e saili ai faailoga tikeri, e saofagā i totonu o le Kolisi a le Pasefika.

O le tofia la o le Susuga i le Faifeau fomai, Reverend Dr. Upolu Lumaafale Vaai, o se tofiga maualuga mo se tama fanau mai Samoa. Ua lona lua ia te ia tama fanau a Samoa na umia lea tulaga maualuga.

O le Susuga i le faifeau fomai o le Ekalesia Faapotopotoga Kerisiano Samoa, Rev Dr Faitala Talapusi, o ia o le uluai Samoa, ma o ia foi o le uluai faifeau EFKS na filifilia i le tofiga. O Rev Dr Upolu Vaai, o ia o le uluai faifeau Metotisi ua tofia e faauluulu iai le Kolisi o Suesuega o le Tusi Paia.

Na faafetaia e le Susuga i le alii faifeau fomai, le lagolagosua a lona aiga, i lona tina, aua ua fai i lagi le folauga a lona tama,  aemaise le tapuaiga a taitai o le Ekalesia Metotisi, o lona atunuu faapea ai ma lona toalua ma lana fanau ua faaeaina ai lona taumafaiga.

I lana feau tusitusia i luga o upega tafailagi na ia faaalia ai lona agaga faafetai i ona aiga uo ma ē masani mo feau faamalo na tuuina atu ina ua ia maua lea tofiga.

O lipoti mai Fiti, o loo faaalia ai e toaluasefulu 20 le aofai o tusi talosaga mo le avanoa, e aofia ai ma Vaai. Ae ua filifilia o ia e sui tulaga i le alii pule o loo iai nei.

E tele tusitusiga na tusia e le alii faifeau fomai, e aofia ai ma se tasi o tusi na ia tusia talu ai nei ua faaigoaina o le Matua Gagana, poo se tusi o loo agai tonu i le Tusi Paia ma lona faitauga loloto mai i le Itulagi o Samoa.

O le tusi foi lea e iai le talitonuga o mafaufauga o le alii faifeau fomai, ua tatau ai ona toe foi tagata uma i le loloto o le Tusi Paia.

“O lana saunoaga, o le Matua Gagana, o se taiala mo soo se tagata o fia saili i le ‘loloto’ o le Tusi Paia mo ni tali i le fafati faagalu o faafitauli.”

“O le Matua Gagana e matua ma fesili iai soo se tagata mo ni taiala faaleagaga. I faafitauli ua tutupu mai i le itulagi o Samoa, e pei o faafitauli i uso, o mātua, o aiga, o nuu, o eleele, o le Ekalesia, o tagata faigaluega, o le malo, ma le atunuu.”

O loo faaalia foi e le alii tusitala, o loo taoto ai i ana tusitusiga ia le “mataupu silisili” poo le “telosia” mo aso uma (theology for everyday life) e taiala ai mafaufauga ma faiga filifiliga, o le amio, tausiga o le va, ola a’oa’oina, ola tapuai, ola tautua, ola saili, galuega faafaifeau, va ma le foafoaga, upufai o malo, faapea foi pulega o aiga, ekalesia ma nuu. “O se tusi mo tagata uma.” A’o lei tofiaina Upolu i lona tofiga fou sa galue o le faauluuluga (Head of Department) o le Mataupu Silisili ma le Efika – Theology and Ethics i le PTC i Suva i Fiti.

O ia o se faiaoga sinia o loo a’oa’oina ma fautuaina faailoga o le Bachelor of Divinity, Master of Theology ma le Doctor of Philosophy i lena lava Kolisi. O le faifeau faauu o le Ekalesia Metotisi i Samoa, sa faiaoga foi i le Kolisi faafaifeau i Piula. O le sui o le komiti Faatonu o le Pacific Journal of Theology i Suva.

Sa galue foi o se tasi o sui o le Komiti Faatonu a le malo Samoa.

Ua tele ana tusitusiga e aofia ai le Motu ma le Taula, Vaatapalagi ma le Matua Gagana. O loo aumau i Suva i Fiti ma lona faletua, ia Tuamasaga Vaai ma le la fanau e toafā.