O le tausaga e 2015 na amata ona faatalanoa ai e le komiti o le Aoga tulagalua a Solosolo le toe faafou o le faleaoga ma fau nisi potu faaopoopo ona ua toatele fanau a le nuu o loo a’oa’oina ae ua vaapiapi potu aoga.
Na faaalia e le tofa Tufeao Fanolua o le taitaifono o le komiti a le aoga, na silasila le komiti poo fea e saili iai se fesoasoani tau tupe mo le faamoemoe ma savalia ai le ofisa o Iapani, peitai, na taatia le galuega ao tapena le palota tele o le 2016. Na toe faaauau le faamoemoe i le saili o se seleni ina ua mae’a le palota ma faatonuina ai e le ofisa o Iapani le tuuina atu o vaega e manaomia mo le iloiloina o le talosaga a le komiti.
O le amataga o le tausaga e 2017 na maua ai le tali ua talia ae na faato’ā faamatuu le foai tupe a Iapani i le amataga o le tausaga nei 2018 ma amata ai loa le galuega.
Faaalia e Tufeo e 165 afe le fesoasoani a le nuu faaopoopo iai ma le nonogatupe e $40 afe na tau faamae’a ai nisi o vaega o le galuega.
O Iapani na maua atu ai le $280 afe tala ae o isi sao o le nuu o le kamuta ma le la’uina o le maa ma le oneone faaopoopo iai ma tagata sa fesoasoani i le galuega.
“E lei faigofie lenei faamoemoe ae sa taumafai lava le komiti e faatino le galuega i se tulaga lelei ina ia mautinoa ia malosi le faleaoga ma lelei potu mo fanau aemaise o potu mo faiaoga.
O se tasi itu mataina i le galuega ua umusa, ona ua fausia ai ma le faleaoga faata’ita’i i totonu o le lotoā o le aoga tulagalua. O se isi lea tulaga lelei ona o le a aooga faatasi fanau i le vaega o aoga amata ma fanau ua i totonu o vasega o le aoga tulagalua mai le vasega Tausaga Tasi e oo i le Tausaga Valu.
Na faaalia e se tasi o faiaoga o se itu lelei tele auā o le a faaosofia ai lagona fia aoga o tamaiti laiti o loo faamasani i le alu i le aoga, aua o nisi o nuu ma afioaga e ese le nofoaga o loo iai le aoga faata’ita’i ese le nofoaga o loo iai le aoga tulagalua.
O le Sui Palemia le afioga i le Minisita o le Soifua Maloloina, Tuitama Talalelei Tuitama na saunoa i le saunoaga autu ae o le Minisita o Aoga Taaloga ma Aganuu, le afioga Loau Solamalemalo Keneti Sio, na ia ootiina le lipine.
O faaaloaloga a le afioaga na faasopolia ai le auvalaaulia i le taumafataga aemaise o sua ta’i.
